SportPress.kz Қазақстан спорт жаңалықтары
Қазақстанға бокстан Кубаның ерлер құрамасы келді. Бостандық елінің боксшылары еліміздің былғары қолғап шеберлерімен бірге оқу-жаттығу жиынына қатысып, Ғалым Жарылғаповты еске алуға арналған халықаралық турнирге қатысады, деп хабарлады Қазақстан бокс федерациясы.
Қонақтар қатарында барлығы 9 былғары қолғап шебері мен екі жаттықтырушы келді. Олардың арасында әлем чемпионатының және Панамерикалық чемпионаттың қазіргі финалистері, көптеген халықаралық турнирлердің жеңімпаздары мен жүлдегерлері бар. Негізгі екпін олимпиадалық салмаққа аударылған.
Куба құрамасының бас жаттықтырушысы Карлос Мануэль Перес Рейестің айтуынша, оның боксшыларының арасында тәжірибелі спортшылар да, жастар да бар.
Біз Қазақстанға алғаш рет келіп отырған жоқпыз. Бізде бокста елдер арасында жақсы достық бар. Сондықтан, командамызбен бірлескен оқу-жаттығу жиынын өткізу, сонымен қатар Ғалым Жарылғаповты еске алуға арналған дәстүрлі турнирде өз өнерлерімізді көрсету туралы шешім қабылдадық. Мен өз атымнан және Куба құрамасының атынан Қазақстанға шақырғандарыңыз үшін алғыс айтамын, — деді ол.
Қазақстан құрамасының бас жаттықтырушысы Мырзағали Айтжановтың тәрбиеленушілері мен Азаттық аралынан келген қонақтардың қатысуымен Қарағанды қаласында 4-16 желтоқсан аралығында оқу-жаттығу жиыны өтеді.
17 желтоқсанда Қарағандыда Қазақ КСР еңбек сіңірген жаттықтырушысы Ғалым Жарылғаповты еске алуға арналған ХХХІХ халықаралық турнир басталады. Ерлер мен әйелдер арасындағы үздіктер 21 желтоқсанда анықталады.
