SportPress.kz قازاقستان سپورت جاڭالىقتارى
تۋريزم جانە سپورت ءمينيسترى ەرمەك مارجىقپاەۆ ۆەلوسپورت فەدەراتسياسىنىڭ باسشىلىعىمەن كەزدەسىپ، بيىلعى ەسەبىن تىڭدادى. فەدەراتسيا وكىلدەرى سپورتشىلاردىڭ ناتيجەلەرى تۋرالى ايتىپ، تورتجىلدىقتىڭ باستى دوداسىنا دايىندىق جوسپارلارىنا توقتالدى، دەپ حابارلادى ۆەدومستۆو.
بيىلعى جىلعى ازيا ويىندارىندا ۆەلوشوسسەدەن قازاقستان قۇراماسى جاقسى ناتيجە كورسەتىپ، ەكى التىن جانە ءبىر كۇمىس جۇلدەگە يە بولدى. ال ايەلدەر باسەكەسىندە ءبىر قولا مەدال بار. ۆەلوترەك پەن ماۋنتينبايك (تاۋ ۆەلوسيپەدى) جارىسىندا وكىنىشكە قاراي، قازاقستان سپورتشىلارى جۇلدەگەرلەر قاتارىنان كورىنە المادى.
وتاندىق ۆەلوسپورتتا جەڭىسپەن ورىلگەن جاقسى ءداستۇرىمىز بار. ۇلتتىق قۇراما سپورتشىلارى بيىلدىڭ وزىندە جاقسى ناتيجە كورسەتتى. الەكسەي لۋتسەنكو مەن ەۆگەني فەدوروۆتىڭ ماۋسىم بويى ءساتتى ونەر كورسەتۋىنىڭ ارقاسىندا سپورتشىلار وليمپيادانىڭ ءۇش جولداماسىن الدى. ۆەلوشاباندوزداردىڭ حانچجوۋداعى جەتىستىگى وليمپيا ويىندارىندا جۇلدەلى ورىنداردان ءۇمىتتى ەكەنىمىزدى ايعاقتايدى.
ۆەلوسپورت – مەدال قاجەت ەتەتىن سپورت ءتۇرى. ال ۆەلوترەك پەن ماۋنتينبايك سياقتى باسقا دا باعدارلامالار بويىنشا جاتتىعۋ جوسپارىن قايتا قاراۋ كەرەك. ۇلتتىق قۇرامانىڭ كوشباسشىلارى جەكە دايىندىق جوسپارىن قاتاڭ ۇستانۋعا ءتيىس، — دەدى كەزدەسۋدە ەرمەك مارجىقپاەۆ.
ۆەلوسپورت بويىنشا وليمپيادالىق ىرىكتەۋ سايىستارى اياقتالىپ، قازاقستان ۇلتتىق قۇراماسىنىڭ سپورتشىلارى پاريج وليمپياداسىنا دايىندىق جۇمىستارىن باستادى.
تۋريزم جانە سپورت مينيسترلىگى وليمپياداعا دەيىن سپورتشىلاردىڭ وقۋ-جاتتىعۋ جيىنىن ۇيىمداستىرۋعا، فارماكولوگيالىق جانە ۆەلوشاباندوزداردى قالپىنا كەلتىرۋ قۇرالدارى بويىنشا بارلىق قاجەتتى جاعدايدى جاساۋعا كومەكتەسەدى.
جيىن سوڭىندا مينيستر وتكەن جارىستاردىڭ، اتاپ ايتقاندا ۆەلوترەك پەن ماۋنتيبايكتىڭ ناتيجەلەرىنە تەرەڭ تالداۋ جۇرگىزۋدى، سونداي-اق پاريج وليمپياداسى الدىندا كوماندا ىشىندە اۋىزبىرشىلىكتى ساقتاۋدى تاپسىردى.
