سپورتتى ومىرلەرىنىڭ سەرىگى ەتكەن جەلتوقسان قاھارماندارى (فوتو)

تاۋەلسىزدىك كۇنى جاقىنداعان سايىن جەلتوقسان باتىرلارىنىڭ اراسىندا ءتۇرلى ءىس-شارالار، كەزدەسۋلەرمەن بىرگە سپورتتىق دودالى جارىستار قىزۋ وتە باستايتىنى بەلگىلى.

بۇگىن الماتى قالاسىنداعى «اينابۇلاق» شاعىن اۋدانىندا ورنالاسقان № 129 جالپى ءبىلىم بەرۋ مەكتەبىندە تاۋەلسىزدىك كۇنىنە وراي، تاعى ءبىر تارتىستى Cپارتاكيادا بولىپ ءوتتى.

جارىسقا جەتىسۋ اۋدانىنداعى 19 ۇيىمىنىڭ اتىنان كوماندالار كەلىپ قاتىسىپ، سپورتتىڭ دارتس، شاحمات، ۆولەيبول سىندى تۇرلەرىنەن كۇشتەرىن سىنادى. سپارتاكياداعا قاتىسقان جەلتوقسان ۇيىمدارىن سارالاي كەتسەك ولار;

1. جەلتوقسان اقيقاتى
2. جەلتوقسان الماتى
3. جەلتوقسان زەينەتكەرلەرى
4. ءاز جەلتوقسان
5. جەلتوقسان قىراندارى
6. جەلتوقسان قوعامى
7. جەلتوقسان عاسىر تاريحى
8. جەلتوقسان مادەني-تاعىلىم ۇيىمى
9. جەلتوقسان جۇلدىزدارى
10. «جەلتوقسان رەسپۋبليكالىق حالىقتىق وتانشىلدىق قوزعالىسى» اتتى ۇيىمداردىڭ كوماندالارى. وسىنداي تارتىسقا تولى باسەكەنى وتكىزۋگە «جەلتوقسان رەسپۋبليكالىق حالىقتىق وتانشىلدىق قوزعالىسى» قوعامدىق بىرلىستىگىنىڭ جەتىسۋ اۋدانى بويىنشا توراعاسى كەنجەباي اشىربەك ۇلى وتارباي مۇرىندىق بولعان ەكەن.

سونىمەن، جارىس الاڭدارىندا كۇن ۇزاق شەبەرلىكتەرىن سالعان باتىرلاردىڭ اراسىنان توپجارىپ شىققان كوماندالار بەلگىلى بولدى. الدارىنا جان سالماي بارلىعىن باسىمدىقپەن جەڭگەن جەتىسۋ اۋدانى «جەلتوقسان اقيقاتى» رەسپۋبليكالىق قوعامدىق بىرلەستىگىنىڭ توراعاسى توكەن سماعۇلوۆ باستاعان ۇجىم بارلىق سپورت تۇرىنەن جەكە دارا كوش باستاپ جەڭىمپاز اتاندى. اسىرەسە، كەسكىلەسكەن ۆولەيبول ويىندارى بەينەبىر ەل بىرىنشىلىگى ءوتىپ جاتقان سەكىلدى تارتىستى ءارى تارتىمدى بولدى. قارسىلاستارىن قوعاداي جاپىرىپ جەڭىستىڭ باس كۋبوگىن ولجالاعان جەتىسۋ اۋدانى «جەلتوقسان اقيقاتى» كومانداسىنا بۇل كۇنى لايىقتى قارسىلىس تابىلمادى دەسە بولعانداي.

ءيا، جەتىسۋ اۋدانى «جەلتوقسان اقيقاتى» ۇجىمىنىڭ وسىنداي الامانداردا توپجارۋىنىڭ ءوز سەبەبى بار. ويتكەنى، بۇگىندە الپىستىڭ اسۋىنا الدى شىققان ارداگەر باتىرلار، مەن قارتايدىم دەپ قوعامنان تىس تىرپ ەتپەي جامباستاپ جاتىپ الماي، سپورتپەن اينالىسىپ بەلسەندى ءومىر ءسۇرۋىنىڭ جەمىسى وسى بولار. سوندىقتاندا «جەلتوقسان اقيقاتى» باتىرلارىنىڭ بۇل قادامدارى جاستارعا ۇلكەن ۇلگى -ونەگە دەپ بىلەمىز. العان بەتتەرىڭىزدەن قايتپاي، سپورتتى ومىرلەرىڭىزدىڭ نەگىزى تىرەگى ەتە بەرىڭىزدەر! اللا الدارىڭنان جارىلقاسىن دەيمىز!

اقىن ورداباي ۇلى،

الماتى