Sportty ómirleriniń serigi etken Jeltoqsan qaharmandary (FOTO)

Táýelsizdik kúni jaqyndaǵan saıyn Jeltoqsan batyrlarynyń arasynda túrli is-sharalar, kezdesýlermen birge sporttyq dodaly jarystar qyzý óte bastaıtyny belgili.

Búgin Almaty qalasyndaǵy «Aınabulaq» shaǵyn aýdanynda ornalasqan № 129 jalpy bilim berý mektebinde Táýelsizdik kúnine oraı, taǵy bir tartysty Cpartakıada bolyp ótti.

Jarysqa Jetisý aýdanyndaǵy 19 uıymynyń atynan komandalar kelip qatysyp, sporttyń darts, shahmat, voleıbol syndy túrlerinen kúshterin synady. Spartakıadaǵa qatysqan Jeltoqsan uıymdaryn saralaı ketsek olar;

1. Jeltoqsan Aqıqaty
2. Jeltoqsan Almaty
3. Jeltoqsan Zeınetkerleri
4. Áz Jeltoqsan
5. Jeltoqsan Qyrandary
6. Jeltoqsan Qoǵamy
7. Jeltoqsan Ǵasyr tarıhy
8. Jeltoqsan Mádenı-taǵylym uıymy
9. Jeltoqsan Juldyzdary
10. «Jeltoqsan respýblıkalyq halyqtyq otanshyldyq qozǵalysy» atty uıymdardyń komandalary. Osyndaı tartysqa toly básekeni ótkizýge «Jeltoqsan respýblıkalyq halyqtyq otanshyldyq qozǵalysy» qoǵamdyq birlistiginiń Jetisý aýdany boıynsha tóraǵasy Kenjebaı Áshirbekuly Otarbaı muryndyq bolǵan eken.

Sonymen, jarys alańdarynda kún uzaq sheberlikterin salǵan batyrlardyń arasynan topjaryp shyqqan komandalar belgili boldy. Aldaryna jan salmaı barlyǵyn basymdyqpen jeńgen Jetisý aýdany «Jeltoqsan Aqıqaty» respýblıkalyq qoǵamdyq birlestiginiń tóraǵasy Tóken Smaǵulov bastaǵan ujym barlyq sport túrinen jeke dara kósh bastap jeńimpaz atandy. Ásirese, keskilesken voleıbol oıyndary beınebir el birinshiligi ótip jatqan sekildi tartysty ári tartymdy boldy. Qarsylastaryn qoǵadaı japyryp jeńistiń bas kýbogyn oljalaǵan Jetisý aýdany «Jeltoqsan Aqıqaty» komandasyna bul kúni laıyqty qarsylys tabylmady dese bolǵandaı.

Iá, Jetisý aýdany «Jeltoqsan Aqıqaty» ujymynyń osyndaı alamandarda topjarýynyń óz sebebi bar. О́ıtkeni, búginde alpystyń asýyna aldy shyqqan ardager batyrlar, men qartaıdym dep qoǵamnan tys tyrp etpeı jambastap jatyp almaı, sportpen aınalysyp belsendi ómir súrýiniń jemisi osy bolar. Sondyqtanda «Jeltoqsan Aqıqaty» batyrlarynyń bul qadamdary jastarǵa úlken úlgi -ónege dep bilemiz. Alǵan betterińizden qaıtpaı, sportty ómirlerińizdiń negizi tiregi ete berińizder! Alla aldaryńnan jarylqasyn deımiz!

Aqyn ORDABAIULY,

ALMATY