Еліміз ICAO бастамаларын қолдады

Алматыда TRIP жолаушыларды сәйкестендіру бағдарламасы бойынша аймақтық симпозиум өтті.

Ауқымды шара барысында салалық халықаралық және қазақстандық ұйымдар әуе жолаушыларды сәйкестендіру мәселелерін талқылады.

Іс-шарада Халықаралық азаматтық авиация ұйымының (ХААҰ) Авиациялық қауіпсіздік және жеңілдету секторы директорының орынбасары Сильвен Лефуайе терроризм қаупін айтарлықтай төмендетуге мүмкіндік беретін шекаралық және сәйкестендіру бақылауын жақсарту бойынша қабылданып жатқан шаралар туралы айтты.

Жалған жеке куәліктерді және жалған жол жүру құжаттарын пайдалану трансшекаралық қылмыстық желілер жиі қолданылатын маңызды әдіс болып қала береді. Аймақтағы мемлекеттерге осы қиындықтарды шешуге көмектесу үшін ХААҰ Аймақтық симпозиумы жол жүру құжаттарының қауіпсіздігінің маңыздылығын көрсету бойынша үздіксіз күш салуға үлес қосады. Әсіресе, ол осы құжаттарды беретін жүйелердің тұтастығын қамтамасыз етуде, мұндай құжаттарды тексермеден және сараптамадан өткізуге үлес қосады, – деді ол.

Симпозиумға қатысушылар бар олқылықтар мен биометрия сияқты құралдарды қалай тиімді пайдалануға болатынын анықтау үшін жол жүру құжатының қауіпсіздігінің әртүрлі аспектілерін қарастырды. Өз кезегінде Көлік вице-министрі Талғат Ластаев құттықтау сөзінде еліміздің авиациялық билігі азаматтық авиацияның қауіпсіз дамуын қамтамасыз етуге және әуе транзитінің тартымдылығын арттыруға күш салып жатқанын атап өтті. Олар Қазақстанның азаматтық авиация саласын басқарудың жаңа тәсілдерін енгізу және ұшу қауіпсіздігінің халықаралық стандарттарына сәйкестік деңгейін арттыру бойынша белсенді жұмыс жүргізуде.

Айта кету керек, TRIP (Traveller Identification Program) Аймақтық симпозиумы елімізде алғаш рет өткізіліп отыр. Бұл жолаушыларды сәйкестендіру үдерісін басқарудың барлық аспектілері бойынша ақпарат алмасуға мүмкіндік беретін әлемдік деңгейдегі іс-шара. Ол Халықаралық азаматтық авиация ұйымы (ХААҰ) демеушілігімен, Көлік министрлігінің, Азаматтық авиация комитетінің және Авиация әкімшілігінің қолдауымен өткізілді.

Қазақстанның авиациялық әкімшілігінің бас директоры Каталин Раду атап өткендей, симпозиум еліміздің авиациялық индустрияның белсенді қатысушысы ретіндегі ұстанымының жақсы көрсеткіші болады.

TRIP бағдарламасы әртүрлі халықаралық ұйымдардың, авиациялық билік органдарының, мемлекеттік органдардың құзыреттерін қамтитын TRIP стратегиясының бес элементін қамтиды. Қазақстанның географиялық орналасуы аймақтың дамуы мен транзиттік әлеуеті үшін тиімді. Цифрландырудың заманауи жағдайында тұрақты жеке тұлғаны сәйкестендіруге, цифрлық шешімдерді дамытуға және растаушы құжаттаманы жоғары сапалы тіркеуге қатысты көптеген өзекті мәселелер туындайды, – деді ол.

Симпозиумға Канада, Франция, Швейцария, Түркия, Катар, Сингапур, АҚШ, Қытай, Сауд Арабиясы, Австралия, Румыния, Жаңа Зеландия, Германия, Ресей Федерациясы, Әзербайжан мен Армения сияқты 30 елден 280-ден астам адам қатысты.

Халықаралық көші-қон ұйымы (ХҚҰ), Халықаралық әуежайлар кеңесі (ACI), Халықаралық әуе көлігі қауымдастығы (IATA), БҰҰ Босқындар істері жөніндегі жоғарғы комиссарының басқармасы (UNHCR), Интерполдың Бас хатшылығы, Халықаралық қылмыстық сот төрелігі ұйымының полициясы, Еуропалық шекара және жағалау күзеті агенттігі (FRONTEX), сондай-ақ Қазақстан Республикасында өкілдік ететін шетелдік авиакомпаниялар өкілдері қатысып өз ойларын ортаға салды. Қазақстандық тараптың атынан іс-шараға мемлекеттік органдардың (ҚР ҰҚК ШҚ, ІІМ ҚКҚК, ЦДИАӨМ), Қазақстан Республикасы әуежайларының және отандық әуе компанияларының өкілдері қатысып, келелі мәселелер жайлы өз ойларын ортаға салды.

Нұрлан ҚҰМАР,

АЛМАТЫ