ەلىمىز ICAO باستامالارىن قولدادى

الماتىدا TRIP جولاۋشىلاردى سايكەستەندىرۋ باعدارلاماسى بويىنشا ايماقتىق سيمپوزيۋم ءوتتى.

اۋقىمدى شارا بارىسىندا سالالىق حالىقارالىق جانە قازاقستاندىق ۇيىمدار اۋە جولاۋشىلاردى سايكەستەندىرۋ ماسەلەلەرىن تالقىلادى.

ءىس-شارادا حالىقارالىق ازاماتتىق اۆياتسيا ۇيىمىنىڭ (حااۇ) اۆياتسيالىق قاۋىپسىزدىك جانە جەڭىلدەتۋ سەكتورى ديرەكتورىنىڭ ورىنباسارى سيلۆەن لەفۋايە تەرروريزم قاۋپىن ايتارلىقتاي تومەندەتۋگە مۇمكىندىك بەرەتىن شەكارالىق جانە سايكەستەندىرۋ باقىلاۋىن جاقسارتۋ بويىنشا قابىلدانىپ جاتقان شارالار تۋرالى ايتتى.

جالعان جەكە كۋالىكتەردى جانە جالعان جول ءجۇرۋ قۇجاتتارىن پايدالانۋ ترانسشەكارالىق قىلمىستىق جەلىلەر ءجيى قولدانىلاتىن ماڭىزدى ءادىس بولىپ قالا بەرەدى. ايماقتاعى مەملەكەتتەرگە وسى قيىندىقتاردى شەشۋگە كومەكتەسۋ ءۇشىن حااۇ ايماقتىق سيمپوزيۋمى جول ءجۇرۋ قۇجاتتارىنىڭ قاۋىپسىزدىگىنىڭ ماڭىزدىلىعىن كورسەتۋ بويىنشا ۇزدىكسىز كۇش سالۋعا ۇلەس قوسادى. اسىرەسە، ول وسى قۇجاتتاردى بەرەتىن جۇيەلەردىڭ تۇتاستىعىن قامتاماسىز ەتۋدە، مۇنداي قۇجاتتاردى تەكسەرمەدەن جانە ساراپتامادان وتكىزۋگە ۇلەس قوسادى، – دەدى ول.

سيمپوزيۋمعا قاتىسۋشىلار بار ولقىلىقتار مەن بيومەتريا سياقتى قۇرالداردى قالاي ءتيىمدى پايدالانۋعا بولاتىنىن انىقتاۋ ءۇشىن جول ءجۇرۋ قۇجاتىنىڭ قاۋىپسىزدىگىنىڭ ءارتۇرلى اسپەكتىلەرىن قاراستىردى. ءوز كەزەگىندە كولىك ۆيتسە-ءمينيسترى تالعات لاستاەۆ قۇتتىقتاۋ سوزىندە ەلىمىزدىڭ اۆياتسيالىق بيلىگى ازاماتتىق اۆياتسيانىڭ قاۋىپسىز دامۋىن قامتاماسىز ەتۋگە جانە اۋە ءترانزيتىنىڭ تارتىمدىلىعىن ارتتىرۋعا كۇش سالىپ جاتقانىن اتاپ ءوتتى. ولار قازاقستاننىڭ ازاماتتىق اۆياتسيا سالاسىن باسقارۋدىڭ جاڭا تاسىلدەرىن ەنگىزۋ جانە ۇشۋ قاۋىپسىزدىگىنىڭ حالىقارالىق ستاندارتتارىنا سايكەستىك دەڭگەيىن ارتتىرۋ بويىنشا بەلسەندى جۇمىس جۇرگىزۋدە.

ايتا كەتۋ كەرەك، TRIP (Traveller Identification Program) ايماقتىق سيمپوزيۋمى ەلىمىزدە العاش رەت وتكىزىلىپ وتىر. بۇل جولاۋشىلاردى سايكەستەندىرۋ ۇدەرىسىن باسقارۋدىڭ بارلىق اسپەكتىلەرى بويىنشا اقپارات الماسۋعا مۇمكىندىك بەرەتىن الەمدىك دەڭگەيدەگى ءىس-شارا. ول حالىقارالىق ازاماتتىق اۆياتسيا ۇيىمى (حااۇ) دەمەۋشىلىگىمەن، كولىك مينيسترلىگىنىڭ، ازاماتتىق اۆياتسيا كوميتەتىنىڭ جانە اۆياتسيا اكىمشىلىگىنىڭ قولداۋىمەن وتكىزىلدى.

قازاقستاننىڭ اۆياتسيالىق اكىمشىلىگىنىڭ باس ديرەكتورى كاتالين رادۋ اتاپ وتكەندەي، سيمپوزيۋم ەلىمىزدىڭ اۆياتسيالىق يندۋستريانىڭ بەلسەندى قاتىسۋشىسى رەتىندەگى ۇستانىمىنىڭ جاقسى كورسەتكىشى بولادى.

TRIP باعدارلاماسى ءارتۇرلى حالىقارالىق ۇيىمداردىڭ، اۆياتسيالىق بيلىك ورگاندارىنىڭ، مەملەكەتتىك ورگانداردىڭ قۇزىرەتتەرىن قامتيتىن TRIP ستراتەگياسىنىڭ بەس ەلەمەنتىن قامتيدى. قازاقستاننىڭ گەوگرافيالىق ورنالاسۋى ايماقتىڭ دامۋى مەن ترانزيتتىك الەۋەتى ءۇشىن ءتيىمدى. تسيفرلاندىرۋدىڭ زاماناۋي جاعدايىندا تۇراقتى جەكە تۇلعانى سايكەستەندىرۋگە، تسيفرلىق شەشىمدەردى دامىتۋعا جانە راستاۋشى قۇجاتتامانى جوعارى ساپالى تىركەۋگە قاتىستى كوپتەگەن وزەكتى ماسەلەلەر تۋىندايدى، – دەدى ول.

سيمپوزيۋمعا كانادا، فرانتسيا، شۆەيتساريا، تۇركيا، كاتار، سينگاپۋر، اقش، قىتاي، ساۋد ارابياسى، اۆستراليا، رۋمىنيا، جاڭا زەلانديا، گەرمانيا، رەسەي فەدەراتسياسى، ازەربايجان مەن ارمەنيا سياقتى 30 ەلدەن 280-دەن استام ادام قاتىستى.

حالىقارالىق كوشى-قون ۇيىمى (حقۇ)، حالىقارالىق اۋەجايلار كەڭەسى (ACI)، حالىقارالىق اۋە كولىگى قاۋىمداستىعى (IATA)، بۇۇ بوسقىندار ىستەرى جونىندەگى جوعارعى كوميسسارىنىڭ باسقارماسى (UNHCR)، ينتەرپولدىڭ باس حاتشىلىعى، حالىقارالىق قىلمىستىق سوت تورەلىگى ۇيىمىنىڭ پوليتسياسى، ەۋروپالىق شەكارا جانە جاعالاۋ كۇزەتى اگەنتتىگى (FRONTEX)، سونداي-اق قازاقستان رەسپۋبليكاسىندا وكىلدىك ەتەتىن شەتەلدىك اۆياكومپانيالار وكىلدەرى قاتىسىپ ءوز ويلارىن ورتاعا سالدى. قازاقستاندىق تاراپتىڭ اتىنان ءىس-شاراعا مەملەكەتتىك ورگانداردىڭ (قر ۇقك شق، ءىىم قكقك، ءتسدياوم)، قازاقستان رەسپۋبليكاسى اۋەجايلارىنىڭ جانە وتاندىق اۋە كومپانيالارىنىڭ وكىلدەرى قاتىسىپ، كەلەلى ماسەلەلەر جايلى ءوز ويلارىن ورتاعا سالدى.

نۇرلان قۇمار،

الماتى