تۇڭعىش رەت حوككەيدەن ءۇش بىردەي ەل قۇراماسى الەم چەمپيوناتىنا قاتىسادى

ماجارستاننىڭ استاناسى – بۋداپەشت قالاسىندا وتكەن شايبالى حوككەيدەن جاستار اراسىنداعى IA ديۆيزيونىنىڭ الەم چەمپيوناتى اياقتالدى. بۇل دۇرمەكتى دودادا باق سىناعان قازاقستان قۇراماسى مەرزىمىنەن بۇرىن چەمپيوناتتىڭ باس جۇلدەسىن جەڭىپ الدى، دەپ حابارلادى تۋريزم جانە سپورت مينيسترلىگى.

قازاقستان قۇراماسى باستاپقى ءتورت ويىندا ماجارستان، فرانتسيا، دانيا جانە جاپونيا قۇرامالارىن جەڭسە، سوڭعى ماتچتا اۆستريا جاستارىنا بۋليتتەر سەرياسىندا ەسە جىبەردى. جارىس قورىتىندىسىندا سەرگەي ستارىگين جاساقتاعان قۇراما 13 ۇپايمەن توپ جاردى. فرانتسيا قۇراماسى – ەكىنشى، دانيالىقتار ءۇشىنشى ورىنعا يە بولدى. ۇلتتىق قۇراما قاقپاشىسى ۆلاديمير نيكيتين ءتۋرنيردىڭ ۇزدىك قاقپاشىسى اتاندى.

جاستار قۇراماسىنىڭ وسى جەڭىسىنەن كەيىن قازاقستان تاريحي جەتىستىككە جەتتى. ياعني، 2024 جىلى وتەتىن الەم چەمپيوناتىنىڭ توپ-ديۆيزيونىندا بىردەن ءۇش قۇرامامىز – جاسوسپىرىمدەر، جاستار جانە ەرەسەكتەر اراسىنداعى ۇلتتىق قۇراما ونەر كورسەتۋ مۇمكىندىگىنە يە بولدى.

بيىل ءبىزدىڭ شايبالى حوككەيدەن ءار جاستاعى ۇلتتىق قۇرامالارىمىز تاماشا ناتيجەگە جەتىپ، تاريحتا العاش رەت الەم چەمپيوناتىنىڭ ەليتالى ديۆيزيونىندا وينايتىن بولدى. وسى ناتيجەلەردەن-اق ەلىمىزدە شايبالى حوككەيدىڭ قارقىندى دامىپ كەلە جاتقانىن بايقاۋعا بولادى. جىگىتتەر حالىقارالىق ارەنادا ەلىمىزدىڭ نامىسىن ابىرويمەن قورعاپ، قازاقستاننىڭ حوككەي ەلى ەكەنىن دالەلدەدى. جەرلەستەرىمىزدى جارقىن جەڭىستەرىمەن شىن جۇرەكتەن قۇتتىقتايمىن!، — دەدى تۋريزم جانە سپورت ءمينيسترى ەرمەك مارجىقپاەۆ.

ەسكە سالا كەتەيىك، وسى جىلدىڭ ءساۋىر ايىندا جاسوسپىرىمدەر قۇراماسى IA ديۆيزيونىنداعى الەم چەمپيوناتىندا ءبىرىنشى ورىندى يەلەنىپ، ەليتالى توپقا كوتەرىلگەن بولاتىن. ول كەزدە دە ۇلتتىق قۇراماعا سەرگەي ستارىگين جەتەكشىلىك ەتكەن ەدى. ال ەرەسەكتەر قۇراماسى توپتىق كەزەڭدە ءۇش رەت جەڭىسكە جەتىپ، ەليتالى توپتاعى ورنىن ساقتاپ، توپ-ديۆيزيوندا قاتارىنان ءتورتىنشى جىل وينايتىن بولادى.