Rybakınanyń qarsylasy oıynnan bas tartty (VIDEO)

Tennısten Aýstralııanyń Brısben qalasynda ótip jatqan WTA 500 týrnırinde Elena Rybakına jartylaı fınalyna shyqty. Ol shırek fınalda dúnıejúzilik reıtıngte 28-orynda turǵan reseılik Anastasııa Potapovamen kezdesip, birinshi partııanyń oıyny bolyp jatqanda qarsylasynyń jaraqat alýyna baılanysty ½ fınalǵa joldama aldy.

Osyǵan deıin tennısshiler bir ret kezdesip, onda reseılik sportshy jeńgen eken.

Bul joly birinshi partııada esep 2:1 bolǵan kezde Rybakına breık jasap, sodan keıin esep 4:1 bolǵanda, Potapova medıınalyq kómekke júgindi. Budan keıin Qazaqstan tennısshisi taǵy bir breık jasap, tablodaǵy esep 6:1-di kórsetkende reseılik sportshy oıyndy jalǵastyrýdan bas tartty.

Match jarty saǵat qana boldy. Osy ýaqytta Rybakına 2 eıs jasap, 3 breık-poınttyń ekeýin paıdalanyp úlgerdi.

Endi Elena Rybakına fınalǵa shyǵý úshin álemniń 40-raketkasy, chehııalyq Lında Noskovamen nemese reıtıngte 58-satyda turǵan 16 jastaǵy reseılik Mırra Andreevamen kezdesedi.

Taǵy bir ret eske salsaq, týrnırdiń jalpy júlde qory — 1 736 763 dollar. Bul aqshany árıne, jeńimpaz ben júldegerler ózara bólip alady.

Dastan KENJALIN,

ASTANA