ستەند اتۋدان ازيا چەمپيوناتىنا قاتىساتىن قۇراما انىقتالدى

12-22 قاڭتار ارالىعىندا ستەند اتۋدان ازيا چەمپيوناتى بولادى. وندا پاريج وليمپياداسىنا بەرىلەتىن 8 جولداما ۇلەستىرىلەدى. چەمپيونات ليتسەنزيالىق جارىس بولعان سوڭ، وعان كوپ مەملەكەت قاتىسۋعا نيەت ءبىلدىرىپ وتىر.

تۋريزم جانە سپورت مينيسترىلگىنىڭ مالىمەتىنە قاراعاندا، بيىلعى دوداعا 40 ەلدەن 500-گە جۋىق سپورتشى قاتىسادى. ال قازاقستاننىڭ نامىسىن جارىستا 18 مەرگەن قورعايدى.ولاردىڭ اراسىندا جازعى ازيا ويىندارى، الەم كۋبوگىندا ۇزدىك ناتيجە جۇرگەن اسەم ورىنباي، زويا كراۆچەنكو، ولگا پانارينا، ەدۋارد ەششەنكو، ماريا دميترەنكو، ايجان دوسماعانبەتوۆا، اناستاسيا پريلەپينا مەن باسقا دا سپورتشىلار بار.

وسىلاردىڭ ىشىندە اسەم ورىنبايدىڭ ءبىر ءوزىن ايتساق، ول بىلتىر كاتاردىڭ استاناسى – دوحا قالاسىندا نىسانا كوزدەۋدەن وتكەن الەم كۋبوگىنىڭ فينالىندا التىن مەدال جەڭىپ الدى. بىلتىرعى ماۋسىمدا اسەم ورىنباي بىرنەشە رەت جەڭىس تۇعىرىنا كوتەرىلدى. اتاپ ايتار بولساق، 2023 جىلى مامىردا الماتىدا وتكەن رەيتينگتىك الەم كۋبوگىندا جەكەلەي سىندا توپ جارىپ، ءىزىن الا ارىپتەسى ەدۋارد ەششەنكومەن بىرگە كۇمىس جۇلدەگەر اتاندى. ودان كەيىن جازدا لوناتوداعى (يتاليا) الەم كۋبوگىندا ارالاس جۇپتار اراسىندا (ەدۋارد ەششەنكومەن)  ۇشىنشى ورىن الدى. ونىڭ الدىندا قىتايدىڭ حانچجوۋ قالاسىندا جالاۋى كوتەرىلگەن ءحىح جازعى ازيا ويىندارىندا ەدۋارد ەششەنكو ەكەۋى ستەندتىك اتۋ ءتۋرنيرىنىڭ ارالاس جۇپتىق سايىسىندا چەمپيون اتاندى.

كومانداداعى جاسى ۇلكەن سپورتشىمىز ولگا پانارينا دا ازيادانىڭ چەمپيونى بولدى. وسى جانە جوعارىدا اتى اتالعان باسقا دا سپورتشىلارعا ازيا چەمپيوناتىندا ۇلكەن ءۇمىت ارتىلىپ وتىر.

داستان كەنجالين،

استانا