مينيستر ۆولەيبولدان ۇلتتىق قۇرامانى سىنعا الدى

تۋريزم جانە سپورت ءمينيسترى ەرمەك مارجىقپاەۆ ۆولەيبول فەدەراتسياسىنىڭ باسشىلارىمەن جانە جاتتىقتىرۋشىلار شتابىمەن كەزدەستى. جيىندا فەدەراتسيا وكىلدەرى ۆولەيبولدان ۇلتتىق قۇرامالاردىڭ 2023 جىلعى ناتيجەلەرىن قورىتىندىلاپ، الداعى جارىستارعا دايىندىق جوسپارىن تانىستىردى.

قازاقستاندا ۆولەيبول بۇقارالىق سپورت ءتۇرى رەتىندە كەڭ قانات جايىپ كەلەدى. بۇگىندە ەلىمىز بويىنشا 14 مىڭ ۆولەيبول سەكتسياسى جۇمىس ىستەيدى. وندا 600 مىڭنان استام بالا سپورتتىڭ وسى تۇرىمەن تۇراقتى شۇعىلدانادى.

ۆولەيبولدان قازاقستان ۇلتتىق قۇراماسى ەڭ كەيىنگى ءىرى جارىستا سۇرەڭسىز ونەر كورسەتىپ، جۇلدەگەرلەر قاتارىنان كورىنە المادى. ەسەسىنە، جاعاجاي ۆولەيبولىنان ەل قۇراماسى ءۇشىنشى ورىنعا تابان تىرەدى. ۆولەيبول بويىنشا بيىلعى پاريج وليمپياداسىنا جولداما بەرەتىن بارلىق ىرىكتەۋ ءتۋرنيرى اياقتالدى.

ۆولەيبولشىلارىمىزدىڭ حالىقارالىق ارەنادا كورسەتىپ جۇرگەن ناتيجەلەرى كوڭىل كونشىتپەيدى. كلۋبتار اراسىنداعى بىرىنشىلىكتەردى ەسەپكە الماعاندا، وتانداستارىمىز بىرنەشە جىلدان بەرى ازيا چەمپيوناتتارىندا جۇلدەگەرلەر قاتارىنان كورىنە الار ەمەس. ەرلەر اراسىنداعى ۇلتتىق قۇرامامىز سوڭعى رەت 2017 جىلى، ايەلدەر 2005 جىلى كۇمىس مەدال جەڭىپ العان بولاتىن. ءبىزدىڭ ەل پاريجدە وتەتىن وليمپيالىق ويىندارعا قاتىسۋ ءۇشىن الەمدىك رەيتينگتە توپ-5 قۇرامانىڭ قاتارىنا ەنۋىمىز كەرەك ەدى. الايدا، قازىرگى تاڭدا ايەلدەر قۇراماسى الەمدىك رەيتينگتە 32-ءشى، ال ەرلەر قۇراماسى 59-ورىندا تۇر. ياعني، ۆولەيبول سپورتى بويىنشا بىزدە پاريج وليمپياداسىنا قاتىسۋعا مۇمكىندىك جوق دەپ ايتۋعا بولادى، — دەدى ەرمەك مارجىقپاەۆ.

ءوز كەزەگىندە فەدەراتسياسى وكىلدەرى ۆولەيبولداعى باستى پروبلەمالار تۋرالى ايتتى. سولاردىڭ ءبىرى – ۇلتتىق كوماندانىڭ جاس ەرەكشەلىگى. قازىرگى ۋاقىتتا كوماندادا 30 جاستان اسقان سپورتشىلار كوپ. سونداي-اق سپورت فۋنكتسيونەرلەرى ەلىمىزدەگى ۇلتتىق ليگانىڭ دەڭگەيىنىڭ تومەن ەكەنىن، الەمدىك دەڭگەيگە سايكەس كەلمەيتىنىن ايتتى.

جيىندا مينيستر فەدەراتسيا باسشىلىعىنا ۆولەيبولمەن شۇعىلداناتىن وڭىرلەردىڭ قاتارىن كوبەيتىپ، ونى كەڭىنەن دارىپتەۋدى، سونداي-اق قازاقستاننىڭ حالىقارالىق سپورت ۇيىمدارىنداعى وكىلدىگىن ارتتىرۋ بويىنشا جۇمىس جۇرگىزۋدى تاپسىردى. فەدەراتسيادان جەرگىلىكتى بىرىنشىلىكتىڭ دەڭگەيىن كوتەرۋ تالاپ ەتىلدى. سونداي-اق ۆەدومستۆو باسشىسى جاس سپورتشىلاردى دايارلاۋدا جاڭا تاسىلدەردى ەنگىزۋ قاجەتتىگىن ايتتى.