سپورتشىلار وليمپياداعا استانادان اتتانادى

15 قاڭتاردا استاناداعى جاقسىلىق ۇشكەمپىروۆ اتىنداعى جەكپە-جەك سارايىندا IV قىسقى جاستار وليمپياداسىنا قاتىساتىن سپورتشىلاردى سالتاناتتى شىعارىپ سالۋ ءراسىمى وتەدى.

سالتاناتتى راسىمدە شورت-ترەكشى ەراسىل شىڭعىسحان مەن كونكيمەن جۇگىرۋ سپورتىنىڭ وكىلى كريستينا شۋمەكوۆاعا ەلىمىزدىڭ مەملەكەتتىك تۋى تاپسىرىلىپ، سپورتشىلار انت بەرەدى. ولار ەلىمىزدىڭ كوك بايراعىن وليمپيادانىڭ اشىلۋ سالتاناتىندا «مەملەكەتتەر شەرۋى» كەزىندە ۇستاپ شىعادى.

سپورتشىلار جارىستارداعى ۇزدىك ناتيجەلەرى ءۇشىن عانا ەمەس، حالىقارالىق ارەناداعى جەڭىسكە دەگەن جىگەرى ءۇشىن تاڭدالدى.

كريستينا شۋماكوۆانىڭ جاسى 18-دە. ول – كونكيمەن جۇگىرۋ سپورتىنان قازاقستان رەسپۋبليكاسىنىڭ سپورت شەبەرى، ءوزىنىڭ جاس ساناتىنداعى قازاقستان چەمپيونى، 2023 جىلعى الەم كۋبوگىنىڭ كۇمىس جۇلدەگەرى.

ەراسىل شىڭعىسحاننىڭ جاسى 17-دە. ول – شورت-ترەكتەن سپورت شەبەرىنە كانديدات، ءوزىنىڭ جاس ساناتىنداعى قازاقستان چەمپيونى. سونىمەن بىرگە «ازيا بالالارى» 2023 حالىقارالىق جارىسىنىڭ كۇمىس جۇلدەسىن جەڭىپ العان.

جيىنعا تۋريزم جانە سپورت ءمينيسترى، ۇلتتىق وليمپيادا كوميتەتىنىڭ باسشىلارى، سپورت ارداگەرلەرى مەن وليمپيالىق ويىنداردىڭ جۇلدەگەرلەرى قاتىسادى.

IV قىسقى جاستار وليمپياداسى 19 قاڭتاردان 1 اقپانعا دەيىن وڭتۇستىك كورەيانىڭ كانۆون پروۆينتسياسىندا بولادى. ازيا قۇرلىعىندا العاش رەت ۇيىمداستىرىلىپ جاتقان جاسوسپىرىمدەردىڭ قىسقى وليمپياداسىنا الەمنىڭ 50 ەلىنەن 1 800 سپورتشى قاتىسادى دەپ جوسپارلانعان. 7 سپورت تۇرىنەن (15 باعدارلاما) 81 مەدال جيىنتىعى ساراپقا سالىنادى. قازاقستان قۇراماسىنىڭ 42 سپورتشىسى 5 سپورت ءتۇرى بويىنشا باق سىنايدى.

داستان كەنجالين،

استانا