باسكەتبولدان ۇلتتىق قۇرامانىڭ ناتيجەسى كوڭىل كونشىتپەيدى — مينيستر

تۋريزم جانە سپورت ءمينيسترى ەرمەك مارجىقپاەۆ باسكەتبول فەدەراتسياسىنىڭ باسشىلارىمەن جانە جاتتىقتىرۋشىلار شتابىمەن كەزدەستى. جيىندا فەدەراتسيا وكىلدەرى باسكەتبولدان ۇلتتىق قۇرامالاردىڭ بىلتىرعى  جىلعى ناتيجەلەرىن قورىتىندىلاپ، الداعى باسەكەلەرگە دايىندىق جوسپارى تانىستىرىلدى، دەپ حابارلادى ۆەدومستۆو.

باسكەتبولدان قازاقستان قۇراماسى بىلتىر قىتايداعى ازيا ويىندارىندا جانكۇيەرلەردىڭ سەنىمىن اقتاي الماي، ۇزدىكتەر قاتارىنان كورىنە المادى. سونىمەن قاتار ەرلەر اراسىنداعى 5ح5 قۇراماسى پاريج وليمپياداسىنا جولداما بەرەتىن ىرىكتەۋ جارىستارىندا ءساتسىز ويناپ، جولدامادان قاعىلدى. ال 3ح3 باسكەتبولى بويىنشا ءالى ءبىر ىرىكتەۋ جارىسى بار. بيىلعا جوسپارلانعان وليمپيادالىق ىرىكتەۋ باسەكەسىندە توپ جارعان كوماندا عانا ليزەنتسياعا يەلىك ەتەدى.

باسكەتبول – الەمدەگى ەڭ تانىمال سپورت ءتۇرىنىڭ ءبىرى. بۇگىندە ەلىمىزدە 400 مىڭنان اسا ادام سپورتتىڭ وسى تۇرىمەن شۇعىلدانادى. 16 وبلىستاعى بالالار مەن جاسوسپىرىمدەر سپورت مەكتەبىندە 156 بولىمشە جۇمىس ىستەيدى. ستاتيستيكا بويىنشا جىل سايىن باسكەتبولمەن اينالىساتىنداردىڭ سانى ارتىپ جاتقانىمەن، ۇلتتىق قۇرمانىڭ ناتيجەسى تومەندەپ بارادى. تاۋەلسىزدىك جىلدارىنداعى ازيا چەمپيوناتتارىنىڭ ناتيجەسىنە كوز جۇگىرتەر بولساق، 5ح5 باسكەتبولدان ايەلدەر قۇراماسى ەشقاشان ۇزدىك بەس كوماندانىڭ قاتارىنا ەنبەگەن. ەرلەر اراسىنداعى 5ح5 باسكەتبولدان قازاقستان قۇراماسى بىردە-ءبىر رەت الەم چەمپيوناتىنا قاتىسا المادى. ازيا چەمپيوناتتارىنداعى ەڭ ۇزدىك ناتيجە – ءتورتىنشى ورىن. ونىڭ ءوزى 2007 جىلعى كورسەتكىش. ۇلتتىق قۇرامانىڭ ورتاشا جاسى – 33، — دەدى ەرمەك مارجىقپاەۆ.

جيىندا مينيستر باسكەتبول فەدەراتسياسىنىڭ باسشىلىعىنا ۇلتتىق قۇرامالاردىڭ جاتتىقتىرۋشىلارىن قىسقا مەرزىمدە بەكىتۋدى، حالىقارالىق ۇيىمدارداعى وكىلدىكتى كوبەيتۋ جانە حالىقارالىق دەڭگەيدەگى سپورت تورەشىلەرىن دايارلاۋ جونىندەگى جۇمىستى جانداندىرۋدى تاپسىردى. سونداي-اق، ۇلتتىق قۇراما ويىنشىلارىنىڭ ورتاشا جاسىن ازايتىپ، سپورتشىلاردى دايارلاۋدا جاڭا ادىستەمەلىك تاسىلدەردى ەنگىزۋ مۇمكىندىگىن قاراستىرۋ قاجەت ەكەنىن مىندەتتەدى.