يليانى جاسىنا قاراماي، جارىسقا اپاردىق — جاتتىقتىرۋشى وليمپياداداعى جەڭىس تۋرالى

شاڭعىمەن تۇعىردان سەكىرۋدەن قازاقستان كومانداسىنىڭ اعا جاتتىقتىرۋشىسى قايرات بيەكەنوۆ وڭتۇستىك كورەنىڭ كانۆون پروۆينتسياسىنىڭ كاننىن قالاسىندا ءوتىپ جاتقان قىسقى جاسوسپىرىمدەر وليمپياداسىندا العاشقى التىن مەدالدى جەڭىپ العان يليا ميزەرنىحتىڭ تاريحي جەڭىسى تۋرالى ايتتى.

Olympic.kz-ءتىڭ حابارلاۋىنشا، وليمپيادا باستالماي تۇرىپ، بيەكەنوۆ يليا ميزەرنىحتان ۇلكەن ءۇمىت كۇتەتىنىن، ونىڭ باس جۇلدەنى جەڭىپ الۋعا مۇمكىندىگى كوپ ەكەنىن ايتقان بولاتىن. بىلىكتى جاتتىقتىرۋشىنىڭ بولجامى ءدال كەلىپ، جارىستىڭ ءبىرىنشى كۇنى شاڭعىمەن تۇعىردان سەكىرۋدەن جاسوسپىرىمدەر وليمپياداسىنىڭ چەمپيونى اتاندى.

يليانىڭ جەڭىسى ەلىمىز ءۇشىن ۇلكەن جەڭىس بولدى. ول وليمپياداعا قاتىسىپ جاتقان باسقا سپورتشىلارعا ۇلكەن ءۇمىت، سەنىم وياتتى. ءبىز ءبارىمىز يليانىڭ التىن جۇلدەسىنە قۋانىپ جاتىرمىز. بۇل قازاقستان ءۇشىن دە، ەلىمىزدەگى شاڭعىمەن تۇعىردان سەكىرۋ سپورتشى ءۇشىن دە ۇلكەن جەتىستىك. مەن بۇعان دەيىن وسى سپورتشىنىڭ جۇلدەگە تالاساتىنىن ايتتىم. ايتقانىم راس بولىپ شىقتى. ءبىز يليانى ويىندارعا ماقساتتى تۇردە دايىندادىق.

ونى جاسىنا قاراماي، ەرەسەكتەر قۇراماسىنا قوستىق. بىلتىرعى قاراشادان باستاپ ول ەرەسەكتەر اراسىنداعى الەم كۋبوگى كەزەڭدەرىنە قاتىسىپ، تاجىريبە جيناي باستادى. الەم كۋبوگىندا جيعان تاجىريبە يلياعا وليمپيادادا كومەك بولدى، — دەدى بيەكەنوۆ.

ونىڭ ايتۋىنشا، جاسوسپىرىمدەر وليمپياداسىندا يليا ميزەرنىحتىڭ قارسىلاستارى تۋرالى مالىمەت مۇلدە از بولعان. سول سەبەپتى بار جاۋاپكەرشىلىك ءوز سپورتشىلارىمىزعا ارتىلدى.

بار جاۋاپكەرشىلىكتى وزىمىزگە ارتتىق. ال قارسىلاستارعا كەلەر بولساق، ولاردىڭ باسىم بولىگىن جارىستاردا بايقامادىق. ءبارى دە جاس سپورتشىلار. ولار بىلتىر الەم كۋبوگى كەزەڭدەرىنە قاتىسپادى. دەسە دە، بولاشاقتا ولاردان مىقتى اتلەت شىعاتىنى ءسوزسىز. يليا دا وتە ەڭبەكقور بالا. بۇل جەتىستىگىنە تازا ەڭبەكپەن جەتتى، — دەدى جاتتىقتىرۋشى.

يليا ميزەرنىح كانۆونداعى جاسوسپىرىمدەر وليمپياداسىندا شاڭعىمەن تۇعىردان سەكىرۋدەن 38 ەلدىڭ سپورتشىسىمەن سىنعا ءتۇسىپ، توپ جاردى.