مىرزاعالي ايتجانوۆ — شويىن جۇدىرىقتى جاتتىقتىرۋشى

بوكستان قازاقستان ۇلتتىق قۇراما كومانداسىنىڭ باس جاتتىقتىرۋشىسى مىرزاعالي ايتجانوۆتىڭ كەزىندە شارشى الاڭدا ەل نامىسىن قورعاپ، دۇرمەكتى دودالاردا ەلىمىزدىڭ جالاۋىن بيىككە كوتەرتكەن اتاقتى بىلعارى قولعاپ شەبەرى بولعانىن بىلەمىز. جاقىندا ءبىز، www.sportpress.kz سايتىنىڭ رەداكتسياسى مىرزەكەڭنىڭ 1990-جىلدارداعى جەكپە-جەكتەرىن قاراپ وتىرىپ، ىقشامدالىپ تۇسىرىلگەن مىنا ۆيدەونى جاريالاۋدى ءجون كوردىك.

بۇل بەينەجازبادا مىرزاعالي ايتجانوۆتىڭ رينگتە نامىستى قولدان بەرمەيتىن نوكاۋتەر بوكسشى بولعانىن، قارسىلاستارىن بىرىنەن سوڭ ءبىرىن سۇلاتىپ، تىزە بۇكتىرىپ جاتقانىن كورۋگە بولادى.

مىرزاعالي قۇلان ۇلى 1970 جىلى 13 قىركۇيەكتە وڭتۇستىك قازاقستان وبلىسى، سايرام اۋدانى،  قاراباستاۋ اۋىلىندا تۋعان.  ول بالا كەزىنەن بىلعارى قولعاپتى كيىپ، شارشى الاڭنىڭ شاڭىن قاعىپ وسكەن. كەيىن ەر جەتىپ، رەسپۋبليكا قۇرامىندا كسرو چەمپيوناتىن جەڭىپ العان. 1988 جىلى جاستار اراسىنداعى ەۋروپا چەمپيونى اتانعان. مىرزاعالي ايتجانوۆ ءوزىنىڭ جاتتىقتىرۋشىلىق قىزمەتىن 1996 جىلدان باستاپ، وسى كەزگە دەيىن جالعاستىرىپ كەلەدى. 2000 — 2009 جىلدارى وڭتۇستىك قازاقستان وبلىسىنىڭ اعا جاتتىقتىرۋشى قىزمەتىن اتقارادى. 2009 جىلدان بەرى قازاقستاننىڭ بوكستان ۇلتتىق قۇراما كومانداسىنىڭ باس جاتتىقتىرۋشى. قازىر ونىڭ قاراماعىندا جاتتىعىپ، ۇلتتىق قۇراما ساپىندا شارشى الاڭعا شىعىپ جاتقان بوكسشىلار وليمپيادا، الەم، ازيا چەمپيونى اتانىپ، تالاي ءدۇبىرلى دودالاردا توپ جارىپ ءجۇر.

مىرزاعالي قۇلان ۇلى – حالىقارالىق دارەجەدەگى سپورت شەبەرى، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى.

داستان كەنجالين