فۋتبولدان قازاقستان قۇراماسى تۇركىمەنستانمەن جولداستىق ماتچ وتكىزەدى

 قازاقستان فۋتبول فەدەراتسياسى ۇلتتىق قۇرامانىڭ تۇرىكمەنستان كومانداسىمەن جولداستىق كەزدەسۋ وتكىزەتىنى تۋرالى حابارلادى.

ۇلتتىق قۇراما 8 ناۋرىزدا ۋەفا ۇلتتار ليگاسىنىڭ پلەي-وفف كەزەڭىنىڭ جارتىلاي فينالىندا گرەكيامەن وتەتىن ويىن الدىندا دۋبايدا وقۋ-جاتتىعۋ جيىندارىن باستايدى. ال 14 ناۋرىزدا تۇرىكمەنستان قۇراماسىنا قارسى جولداستىق ويىن جوسپارلانىپ وتىر.

ەلىمىزدىڭ باس كومانداسىنىڭ گرەكياعا قارسى ەۋروپا چەمپيوناتى ىرىكتەۋ كەزەڭىنىڭ پلەي-وفف ماتچى 21 ناۋرىزدا افينا قالاسىندا بولادى.

بۇعان دەيىن قازاقستان مەن تۇرىكمەنستان قۇرامالارى ءوزارا ءۇش رەت ويناعان. كوماندالار العاش رەت 1992 جىلى 1 ماۋسىمدا الماتىدا ورتالىق ازيا كۋبوگى جولىنداعى ءتۋرنيردىڭ فينالدىق كەزەڭدە كەزدەسكەن. بۇل ويىندا قازاقستان تۇرىكمەنستان كومانداسىن 1:0 ەسەبىمەن جەڭگەن.

ەكىنشى ماتچ اشحاباد قالاسىندا بولعان. سول جىلى 14 قىركۇيەكتە ورتالىق ازيا كۋبوگىنىڭ فينالدىق كەزەڭدە قارسىلاستار 1:1 ەسەبىمەن تەڭ تارقاسقان. ال ءۇشىنشى رەت قۇرامالار 1994 جىلى 15 ساۋىردە تاشكەنت قالاسىندا باس قوسقان. كوماندالار وزبەكستان تاۋەلسىزدىگىنىڭ كۋبوگى جولىنداعى جارىستىڭ فينالدىق كەزەڭدە ويناپ، ءبىر-بىرىنە گول سالا الماي كەتكەن. ماتچ 0:0 بولىپ اياقتالعان.