SportPress.kz قازاقستان سپورت جاڭالىقتارى
ەلىمىز تاۋەلسىزدىك العالى وتىز ەكى جىل بولسا دا، ءالى كۇنگە دەيىن شەتەلدەردەن لەگيونەرلەردى شاقىرۋدى قويار ەمەس. قازاق بالالارىن دايىنداماي، رەسەي مەن افريكادان سپورتشى شاقىرا بەرۋگە ۇيالمايمىز با؟ وتاندىق سپورت سالاسىندا 180 فەدەراتسيا بار. سوڭعى وتكەن جازعى وليمپيادادا نەگە التىن جۇلدە الا الماي قالدىق؟ فەدەراتسيا كوپ، بىراق ناتيجە جوق.
كورشى وزبەكستان مەن قىرعىزستان سپورتى بىزدەن وزىپ كەتتى. ولارعا جەتۋ ءۇشىن قازاق سپورتىنا جۇيەلى رەفورما جاساۋ كەرەك. بۇرىن سپورتشى جانە باسشى بولعان ءماجىلىس دەپۋتاتتارى داۋلەت تۇرلىحانوۆ، ارداق نازاروۆ پەن دانيار قاسقاراۋوۆ پارلامەنت ءماجىلىسىنىڭ وتىرىستارىندا شەتەلدەن سپورتشىلاردى شاقىرۋدى دوعارۋ تۋرالى قاشان ماسەلە كوتەرەدى؟ ءالى كۇنگە دەيىن لەگيونەرلەر تۋرالى ەشقانداي ناقتى زاڭ جوق. فەدەراتسيا باسشىلارى حالىق پەن باق-قا ەسەپ تە بەرمەيدى. بيىل سپورتقا وزگەرىس ەنگىزبەسەك، كەيىن كەش قالامىز.
قازاق جىگىتتەرىنەن وليمپيادا جانە الەم چەمپيوندارىن شىعارا الماساڭىزدار، نە ىستەپ جۇرسىزدەر؟ وزگە ەلدىڭ جولى بولماعان سپورتشىلارىن ەلگە شاقىرعاننان قازاق سپورتى دامىپ كەتپەيدى عوي. شوقىر بولتەك ۇلى، وكتيابر جارىلعاپوۆ، ءالجان جارمۇحامەدوۆ، قابدەن بايدوسوۆ، ءامين تۇياقوۆ، ابىلسەيىت ايحانوۆ، سەيىلدا بايشاقوۆ، عۇسمان قوسانوۆ، ءابدىسالان نۇرماحانوۆ، ءشامىل سەرىكوۆ، قۇرالبەك ورداباەۆ، جاقسىلىق ۇشكەمپىروۆ پەن سەرىك قوناقباەۆتار قازاقتى دۇنيە جۇزىنە تانىتىپ ارتىنا وشپەس ءىز قالدىردى. ال قازىر شەتەلدەردەن كەلگەن سپورتشىلارعا سەنىم ارتامىز. قازاق جىگىتتەرىنىڭ جولىن كەسىپ، وليمپياداعا قاتىساتىن جاستاردىڭ ارماندارىنا بالتا شاۋىپ جاتىرمىز. ويلانايىق، ناقتى شەشىم قابىلداپ، جاستاردى قولدايىق.
قازاقستاندا لەگيونەرلەر ەڭ كوپ توپ-9 سپورت ءتۇرى:
- فۋتبول;
- حوككەي;
- باسكەتبول;
- اۋىر اتلەتيكا;
- ەركىن كۇرەس;
- جەڭىل اتلەتيكا;
- گرەك-ريم كۇرەسى;
- ايەلدەر كۇرەسى;
- تەننيس.
ايبەك مۇحانوۆ،
ماڭعىستاۋ وبلىسى
