قيىن توپقا تۇستىك – ماگومەد اديەۆ

فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ فرانتسيانىڭ پاريج قالاسىندا وتكەن 2024/25 جىلعى UEFA ۇلتتار ليگاسىنىڭ جەرەبەسىندە قيىن توپقا تۇسكەنىن مويىندادى.

قازاقستان ۆ ليگاسىندا اۋستريا، نورۆەگيا، سلوۆەنيا قۇرامالارىمەن بىرگە ءبىر توپقا ءتۇستى. ولار ءۇشىنشى توپتا وينايدى.

باس جاتتىقتىرۋشىنىڭ ايتۋىنشا، قازاقستان ءۇشىنشى توپتا مىقتى قارسىلاستارمەن كۇش سىناسادى. دەگەنمەن ۇلتتىق قۇراما باسەكەنىڭ قيىن بولاتىنىنا قاراماستان ءاربىر ويىندى جەڭۋ ءۇشىن الاڭعا شىعادى.

قيىن توپقا تۇستىك. ونى مويىندايمىن. بىراق توبىمىز قيىن ەكەن دەپ قول قۋسىرىپ وتىرمايمىز عوي. سول ءۇشىن ءاربىر ماچتى جەڭۋ ءۇشىن وينايمىز. ءيا، قارسىلاستار وڭاي ەمەس. تۇسىنەمىن. دەسەك تە حولاند، الابا سەكىلدى ويىنشىلار كەلسە، ءبىز ءۇشىن موينىمىزداعى جاۋاپكەرشىلىك ارتادى. ال سلوۆەنيامەن ەسەبىمىز بار. ونى وزدەرىڭىز دە جاقسى بىلەسىزدەر. سلوۆەنيادان ەسەنى قايتارۋ كەرەك، — دەدى ول.

ازىرشە اديەۆتىڭ جەرەبە تۋرالى ويى وسى.

ەسكە سالساق، قازاقستان قۇراماسى جەرەبە تارتۋ راسىمىنەن بۇرىن ءتورتىنشى قورجىنعا ورنالاستىرىلعان ەدى. بۇل قورجىندا گرۋزيا، تۇركيا مەن ليۋكسەمبۋرگ كوماندالارى بولدى. سودان كەيىن جەرەبە تارتىلعاندا ءۇشىنشى توپقا توپ ەتە ءتۇستى.

ۇلتتار ليگاسىنىڭ توپتىق كەزەڭىنىڭ جاڭا ماۋسىمى قىركۇيەك ايىندا باستالىپ،  قاراشادا اياقتالادى. ناقتىراق ايتساق، توپتىق كەزەڭنىڭ ماتچتارى  5 قىركۇيەك پەن 19 قاراشا ارالىعىندا بولادى. وسى ۋاقىتتا «استانا ارەنا» ستاديونى جوندەۋگە جابىلسا، ۇلتتىق قۇراما الماتىنىڭ ورتالىق ستاديونىنىڭ كوكمايسا الاڭىنا شىعادى.

ويىن كەستەسى كەيىنىرەك جاريالانادى.

داستان كەنجالين،

استانا