Qıyn topqa tústik – Magomed Adıev

Fýtboldan Qazaqstan ulttyq quramasynyń bas jattyqtyrýshysy Magomed Adıev Franııanyń Parıj qalasynda ótken 2024/25 jylǵy UEFA Ulttar lıgasynyń jerebesinde qıyn topqa túskenin moıyndady.

Qazaqstan V lıgasynda Aýstrııa, Norvegııa, Slovenııa quramalarymen birge bir topqa tústi. Olar úshinshi topta oınaıdy.

Bas jattyqtyrýshynyń aıtýynsha, Qazaqstan úshinshi topta myqty qarsylastarmen kúsh synasady. Degenmen ulttyq qurama básekeniń qıyn bolatynyna qaramastan árbir oıyndy jeńý úshin alańǵa shyǵady.

Qıyn topqa tústik. Ony moıyndaımyn. Biraq tobymyz qıyn eken dep qol qýsyryp otyrmaımyz ǵoı. Sol úshin árbir machty jeńý úshin oınaımyz. Iá, qarsylastar ońaı emes. Túsinemin. Desek te Holand, Alaba sekildi oıynshylar kelse, biz úshin moınymyzdaǵy jaýapkershilik artady. Al Slovenııamen esebimiz bar. Ony ózderińiz de jaqsy bilesizder. Slovenııadan eseni qaıtarý kerek, — dedi ol.

Ázirshe Adıevtiń jerebe týraly oıy osy.

Eske salsaq, Qazaqstan quramasy jerebe tartý rásiminen buryn tórtinshi qorjynǵa ornalastyrylǵan edi. Bul qorjynda Grýzııa, Túrkııa men Lıýksembýrg komandalary boldy. Sodan keıin jerebe tartylǵanda úshinshi topqa top ete tústi.

Ulttar lıgasynyń toptyq kezeńiniń jańa maýsymy qyrkúıek aıynda bastalyp,  qarashada aıaqtalady. Naqtyraq aıtsaq, toptyq kezeńniń matchtary  5 qyrkúıek pen 19 qarasha aralyǵynda bolady. Osy ýaqytta «Astana Arena» stadıony jóndeýge jabylsa, ulttyq qurama Almatynyń Ortalyq stadıonynyń kókmaısa alańyna shyǵady.

Oıyn kestesi keıinirek jarııalanady.

Dastan KENJALIN,

ASTANA