Strandja kýbogy: Dýlat Bekbaýov jeńimpaz atandy (VIDEO)

Bokstan ulttyq qurama komandanyń boksshylary Bolgarııanyń astanasy – Sofııa qalasynda Strandja kýbogy úshin bolǵan halyqaralyq týrnırde úsh medal jeńip aldy.

Fınalda 67 kelige deıingi salmaq dárejesinde Dýlat Bekbaýov úndi bylǵary qolǵap ıesi Radjatty jeńip, kýboktyń ıegeri atandy.

Álem chempıony Sanjar Tashkenbaı (51 kg) Úndistannyń ókili  Amıtke ese jiberip, kúmis júldeger atandy. Al Tursynbaı Qulahmet (80 kg) óz salmaǵynda úzdik úshtikti túıindedi. Ol jartylaı fınalda Qytaı elinen kelgen qandasymyz Toqtarbek Tańathannan jeńilip qaldy.

Osylaısha, elimizden boks áleminde kishi álem chempıonaty sanalatyn týrnırge qatysqan 10 boksshynyń arasynan úsh sportshy júlde alyp qaıtty. Byltyrǵy álem chempıonatynyń kúmis júldegeri Dýlat Bekbaýov jalǵyz ózi qara úzip, jeńimpaz atandy.

Bıylǵy týrnırge Sanjar Tashkenbaı (51 kg), Dáýlet Moldashev (54 kg), Orazbek Asylqulov (57 kg), Rýslan Kúzeýbaeva (60 kg), Erasyl Tańqaı (63,5 kg), Dýlat Bekbaýov (67 kg), Talǵat Sháıken (71 kg), Nurqanat Raıys (75 kg), Tursynbaı Qulahmet (80 kg) men  Abzal Kuttybekov (92 kg) qatysty.

Strandja kýbogynda jalpykomandalyq esepte О́zbekstan boksshylary kósh bastady. Olar 5 altyn, 2 kúmis jáne 5 qola medaldi jeńip aldy. Ekinshi orynǵa Úndistan bylǵary qolǵap ıeleri ıe boldy. Bul eldiń sportshylary 2 altyn, 2 kúmis jáne 2 qola júldeni ıelendi. Úshinshi orynǵa 1 altyn, 4 kúmis júlde alǵan Bolgarııanyń boksshylary shyqty. Al Ýkraına 1 altyn, 1 kúmis jáne 3 qola medalmen tórtinshi orynǵa taban tiredi. Besinshi orynda – Qazaqstan. Ulttyq qurama boksshylarynyń qorjynynda 1 altyn, 1 kúmis jáne 1 qola medal bar.

Dastan KENJALIN,

ASTANA

 

View this post on Instagram

 

A post shared by Kazakhstan Boxing Federation (@boxingkazakhstan)