ءجۇز جاستاعى قاريا سۋعا سەكىرۋدەن جۇلدە الدى (ۆيدەو)

كاتاردىڭ دوحا قالاسىندا سۋ سپورتى تۇرلەرىنەن ءوتىپ جاتقان الەم چەمپيوناتىندا يران ەلىنىڭ 100 جاستاعى تاگي اسگا اسگاري دەگەن قارت ازاماتى ءبىر مەتر بيىكتەن سۋعا سەكىرىپ، ارنايى جۇلدە الدى.

بۇل كىسىنىڭ ءوزى دە بۇرىن سپورتپەن اينالىسقان ەكەن. ول سوڭعى رەت 41 جاسىندا يراننىڭ سۋعا سەكىرۋدەن وتكەن چەمپيوناتىنا قاتىسىپ، التىن مەدالدى جەڭىپ العان. سودان كەيىن سپورتپەن قوشتاسىپ، رەسمي جارىسقا قاتىسپاعان.

وسى جولى ول الەم چەمپيوناتىنا قۇرمەتتى قوناق رەتىندە شاقىرىلعان ەدى. بىراق ارداگەر سپورتشى قۇرمەتتى قوناقتار وتىراتىن جەردەگى ورنىنان تۇرىپ، جانكۇيەرلەر الدىندا سۋعا سەكىرىپ، كوپشىلىكتى تاڭقالدىرعان.

مەن سوڭعى رەت 41 جاسىندا ءوز ەلىمنىڭ چەمپيوناتىنا قاتىستىم. سودان بەرى مىنە، 60 جىل دا وتە شىقتى. 1951 جىلى العاش رەت جارىسقا قاتىستىم. سول جىلى ءۇندىستاندا وتكەن ازيا ويىندارىندا باق سىنادىم. 10 مەتر بيىكتەن سەكىرىپ، كۇمىس مەدال، تۇعىردان سەكىرۋدەن قولا جۇلدە العان ەدىم. ءالى ەشتەڭە وزگەرمەگەن ەكەن، — دەدى ول.

الەم چەمپيوناتىندا ۇيىمداستىرۋشىلار تاگي اسگاريگە ءبىر مەتر بيىكتەن سەكىرگەنى ءۇشىن التىن جۇلدەنى تابىس ەتتى.

داستان كەنجالين،

استانا

 

View this post on Instagram

 

A post shared by World Aquatics (@world_aquatics)