SportPress.kz قازاقستان سپورت جاڭالىقتارى
تۋريزم جانە سپورت مينيسترلىگىندە دەنە شىنىقتىرۋ جانە سپورت، ويىن بيزنەسى مەن لوتەرەيا قىزمەتىن رەتتەۋ سالالارىنداعى 2023 جىلعى قىزمەتى مەن 2024 جىلعا قويىلعان نەگىزگى مىندەتتەرى تۋرالى كەڭەيتىلگەن القا ءماجىلىسى بولىپ جاتىر. وعان پرەمەر-ءمينيستردىڭ ورىنباسارى تامارا دۇيسەنوۆا قاتىسۋدا، دەپ حابارلادى ۆەدومستۆو.
جيىندى ۆەدومستۆو باسشىسى ەرمەك مارجىقپاەۆ اشىپ، مينيسترلىكتىڭ بىلتىر اتقارعان جۇمىسى مەن الداعى جوسپارى تۋرالى ايتىپ بەردى. ول ەل ابىرويىن اسقاقتاتار ەلەۋلى سالانى دامىتۋ، سپورتقا بەيىم، باسەكەگە قابىلەتتى بىرەگەي ۇلت، ساليقالى ۇرپاق قالىپتاستىرۋ – ارقايسىمىزدىڭ بورىشىمىز ەكەنىن اتاپ ءوتتى.
مەملەكەت باسشىسى قاسىم-جومارت توقاەۆ «بۇقارالىق سپورتتى دامىتۋ ارقىلى ءبىز ۇلتىمىزدىڭ دەنساۋلىعىن جاقسارتامىز، بۇكىل ەلىمىز ماقتان تۇتاتىن سپورت جۇلدىزدارىنىڭ جاڭا بۋىنىن تاربيەلەپ شىعارامىز» دەپ ايتقان بولاتىن. سونىمەن بىرگە سپورت سالاسىنا تۇبەگەيلى وزگەرىستەر قاجەت ەكەنىنە باسا نازار اۋدارىپ، سالانىڭ ستراتەگيالىق دامۋىنىڭ باسىم باعىتتارىن بەلگىلەپ بەردى.
مينيسترلىك الدىندا بۇقارالىق سپورتتى دامىتۋ مەن جوعارى جەتىستىكتەر سپورتىن جەتىلدىرۋدە اۋقىمدى جۇمىستار تۇر. بۇقارالىق سپورت ساۋلىعىمىزدى نىعايتۋعا باعىتتالسا، ۇلكەن جەتىستىكتەرگە جەتەلەيتىن سپورت – ەلدىڭ وڭ ءيميدجىن قالىپتاستىرادى. وسى رەتتە، كانۆوندا جاسوسپىرىمدەردىڭ قىسقى وليمپياداسى وتكەنىن بىلەسىزدەر. قازاقستان قۇراماسى كورەيا جەرىندەگى بايراقتى باسەكەدە ەل نامىسىن ابىرويمەن قورعاپ، جانكۇيەرلەردى تاريحي جۇلدەلەرىمەن قۋانتتى.
وتانداستارىمىز ءبىر التىن، ەكى كۇمىس مەدال جەڭىپ الدى. مۇنداي جەڭىستەر ۇزدىكسىز دايىندىق پەن قولداۋدىڭ ارقاسىندا كەلەدى. بۇل رەتتە، بىلتىر ءبىز سالانىڭ ستراتەگيالىق دامۋ باعدارىن ايقىنداپ، دەنە شىنىقتىرۋ مەن سپورتتى دامىتۋدىڭ 2029 جىلعا دەيىنگى تۇجىرىمداماسىن قابىلدادىق، — دەدى ەرمەك مارجىقپاەۆ.
ودان كەيىن بايانداماشى وليمپياداعا دايارلىق بارىسىندا سپورتتىق مەديتسينا مەن تاماقتانۋدى قامتاماسىز ەتۋ، سپورتشىلاردى دايارلاۋدىڭ زاماناۋي ينفراقۇرىلىمىن قۇرۋ ماڭىزدى ماسەلە ەكەنىن اتاپ ءوتتى.
بۇدان بولەك، ءارتۇرلى سپورت تۇرلەرىنەن ۇلتتىق قۇراما سپورتشىلارىن دايارلاۋدىڭ تيىمدىلىگىن ارتتىرۋعا باعىتتالعان كەشەندى عىلىمي توپتىڭ جۇمىسى دا اسا قاجەت. سپورت دارىگەرى، رەابيليتولوگ، نۋتريتسيولوگ، تراۆماتولوگ سياقتى مامانداردى شوعىرلاندىرۋ شارالارىن قولعا الۋ قاجەت. فيزيكالىق جاتتىعۋمەن بىرگە سپورتشىلاردى دايارلاۋدىڭ مەديتسينالىق-بيولوگيالىق جانە عىلىمي-ادىستەمەلىك قامتاماسىز ەتىلۋى، كەشەندى تەكسەرۋلەرى دە ماڭىزدى ماسەلەلەر، — دەدى ۆەدومستۆو باسشىسى.
سونىمەن بىرگە مينيستر وسى جىلدىڭ ماڭىزدى وقيعالارىنىڭ ءبىرى – استانادا V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋ ەكەنىن، وعان الەمنىڭ 100-دەن استام ەلىنەن دەلەگاتسيا كەلەتىنىن اتاپ كورسەتتى. ونىڭ ايتۋىنشا، ويىنداردا سپورتتىق ويىندارمەن بىرگە مادەني جانە عىلىمي باعدارلاما دا كەڭىنەن ۇسىنىلادى. جارىستا ەلىمىزدىڭ قۇراماسىنىڭ جاقسى ونەر كورسەتۋى ءۇشىن بارىنشا جاعدايلار جاساۋىمىز قاجەت.
سول سەبەپتى وڭىرلەر دەنە شىنىقتىرۋ جانە سپورت باسقارمالارى باسشىلارىن ۇلتتىق سپورت تۇرلەرىن دامىتۋ بويىنشا جۇمىسىن جانداندىرۋدى سۇرايمىن، — دەدى مينيستر.
القا ماجىلىسىندە ەرمەك مارجىقپاەۆ ويىن بيزنەسى مەن لوتەرەيا قىزمەتىن رەتتەۋ ماسەلەسىنە دە توقتالىپ ءوتتى.
ويىن بيزنەسى سۋبەكتىلەرىمەن بەلسەندى جۇمىس جۇرگىزىلۋدە، زاڭسىز ويىن اۆتوماتتارىنىڭ زالدارى جابىلۋدا. ماسەلەن، «كيبەرنادزور» اقپاراتتىق جۇيەسى ارقىلى ونلاين-كازينو، زاڭسىز بۋكمەكەرلىك كەڭسە سيپاتتىنداعى نەمەسە ولاردى جارنامالاۋشى 4،5 مىڭ ينتەرنەت-رەسۋرستار مەن سىلتەمەلەر بلوكتالدى. بۇدان بولەك Telegram جانە WhatsApp مەسسەندجەرلەرىندە چات-بوت ىسكە قوسىلعان. ول ارقىلى ازاماتتار ويىن بيزنەسى جانە لوتەرەيا سۋبەكتىلەرىنىڭ قىزمەتىندەگى بۇزۋشىلىقتار تۋرالى حابارلاي الادى. بۇگىنگى تاڭدا كەلىپ تۇسكەن 150-دەن استام ءوتىنىش قارالۋدا، — دەدى ول.
كەلەسى كەزەكتە وليمپيالىق ويىندارعا دايىندىق جونىندەگى شتابتىڭ باسشىسى ەلسيار قاناعاتوۆ ءتورت جىلدا ءبىر كەلەتىن دۇرمەكتى دودا مەن پاراليمپياداعا دايىندىق تۋرالى ايتىپ بەردى.
ونىڭ ايتۋىنشا، ازيا ويىندارىنىڭ جۇلدەگەرلەرىن قابىلداۋ كەزىندەگى پرەزيدەنتتىڭ تاپسىرماسىن ورىنداۋ ءۇشىن تۋريزم جانە سپورت ءمينيسترىنىڭ بۇيرىعىمەن قىسقى جاسپوسپىرىمدەر وليمپياداسىنا جانە جازعى وليمپيادا، پاراليمپيادا ويىندارىنا دايىندىق ماسەلەلەرىن ۇيلەستىرۋ ءۇشىن سپورتتى دامىتۋ ديرەكتسياسىنىڭ، ۇلتتىق وليمپيادا كوميتەتىنىڭ جانە فەدەراتسيالاردىڭ بىلىكتى ماماندارىمەن جاساقتالعان ارنايى شتاب قۇرىلدى. قازىرگى تاڭدا شتاب ءوزىنىڭ جۇمىسىن جوسپار بويىنشا اتقارۋدا.
شتابتىڭ جۇمىسى جاسوسپىرىمدەر وليمپياداسىنا دايىندىق ماسەلەرىنەن ۇيىمداسترۋىنان باستالدى. وسى كەشەندى جارىسقا قاتىسۋ بويىنشا مينيسترلىكتىڭ، ۇلتتىق وليمپيادا كوميتەتىنىڭ، فەدەراتسيالاردىڭ قولداۋىمەن بارلىق جاعداي جاسالدى. سونىڭ ارقاسىندا ءبىزدىڭ سپورتشىلارىمىز جاقسى ناتيجە كورسەتىپ قازاق ەلىن جاقسى جاعىنان دۇنيە جۇزىنە تانىتا ءبىلدى. قازىرگى تاڭدا شتاب پاريج قالاسىندا وتەتىن 2024 جىلعى XXحIII جازعى وليمپيادا، XVII پاراليمپيادا ويىندارىنا ۇلتتىق قۇراما كوماندالاردى دايارلاۋدى قامتاماسىز ەتۋ بويىنشا جقمىستارىن اتقارىپ جاتىر.
ماجىلىستە V دۇنيەجۇزىلىك كوشپەندىلەر ويىندارىن ۇيىمداستىرۋعا باسا نازار اۋدارىلدى. وسى ويىندارعا دايىندىق تۋرالى V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋ ديرەكتسياسى ديرەكتورىنىڭ ورىنباسارى ابىلاي قوندىباەۆ بايانداما جاسادى.
جيىندا پرەمەر-ءمينيستردىڭ ورىنباسارى تامارا دۇيسەنوۆا وليمپياداعا جوسپارلانعان 90 ليتسەنزيانى جەڭىپ الۋعا بار كۇش سالۋ كەرەكتىگىن ايتىپ، كوشپەندىلەر ويىندارىن لايىقتى دەڭگەيدە وتكىزۋدى تاپسىردى.
