استانادا بوريس كەرىمباەۆتى ەسكە الۋعا ارنالعان تۋرنير باستالدى (ۆيدەو)

استانادا 2007-2008 جىلى تۋعان جاسوسپىرىمدەر اراسىندا العاش رەت كەڭەس اسكەرىنىڭ اۋعان جەرىنەن شىعارىلعانىنا 35 جىل جانە قازاقتىڭ «قارا مايورى» اتانعان بوريس كەرىمباەۆتى ەسكە الۋعا ارنالعان گرەك-ريم كۇرەسىنەن تۋرنير بولىپ جاتىر، دەپ حابارلادى استانا قالاسىنىڭ اكىمدىگى.

بيىلعى جىلدىڭ العاشقى ءىرى دوداسىنا ەلىمىزدىڭ 12 وبلىسىنان 250-گە جۋىق بالۋان قاتىسۋدا. ونىڭ اشىلۋ سالتاناتىنا گرەك-ريم، ەركىن، ايەلدەر كۇرەس فەدەراتسياسىنىڭ پرەزيدەنتى داۋلەت تۇرلىحانوۆ قاتىسىپ، سپورتشىلارعا يگى تىلەگىن ايتتى.

مۇنداي تۋرنيرلەر تاجىريبە جيناۋعا كەرەمەت مۇمكىندىك. بۇيىرسا، وسى تۋرنيرگە جينالعان جاس بالاۋاندار الداعى ۋاقىتتا  ەرەسەكتەر اراسىندا وتەتىن رەسپۋبليكالىق جارىستاردا باق سىنايتىن بولادى.

اۋعان سوعىسىنىڭ ارداگەرى بوريس كەرىمباەۆ سەكىلدى ەلىمىزدىڭ پاتريوتى بولىپ، ەلىن قورعايتىن باتىر ازامات بولاتىندارىڭىزعا سەنەمىن.

وسى ءساتتى پايدالانا وتىرىپ، 2024 جىلى پاريج وليمپياداسىندا جۇلدەگە تالاساتىن وتانداستارىمىزعا جەڭىس تىلەيمىن!، – دەدى ول.

ۇيىمداستىرۋشىلاردىڭ ايتۋىنشا، وسى تۋرنير الداعى ۋاقىتتا ءداستۇرلى تۇردە ءوتىپ، جىل كۇنتىزبەسىنە كىرگىزىلەتىن بولادى.

جارىسقا اباي، اقمولا، اتىراۋ، جامبىل، جەتىسۋ، قاراعاندى، قىزىلوردا، پاۆلودار، سقو، شقو جانە الماتى مەن استانا قالاسىنان قاتىسىپ جاتىر.

تۋرنيردە  45، 48، 51، 55، 60، 65، 71، 80، 92، 110 كەلى سالماق بويىنشا جەڭىمپازدار انىقتالادى.