تەننيسشى دميتري پوپكو اقش ITF ءتۋرنيرىنىڭ جەڭىمپازى اتاندى

تەننيسشى دميتري پوپكو اقش-تىڭ ناپلەس قالاسىندا وتكەن ITF ءتۋرنيرىنىڭ جەڭىمپازى اتاندى.

ول فينالدا دۇنيەجۇزىلىك رەيتينگىدە 649-ورىندا تۇرعان ەكۆادورلىق اندرەس اندرادەمەن كۇش سىناسىپ، ونى 3:6، 7:6 (7:4)، 6:4 ەسەبىمەن جەڭدى.

بۇل ەكەۋى جاقىندا پالم-كوۋست قالاسىنداعى ءدال وسىنداي جارىستىڭ فينالىندا ويناعان ەدى. سول كەزدە پوپكو قارسىلاسىن 7:5، 1:6، 7:5 ەسەبىمەن جەڭگەن بولاتىن. ەندى ەكۆادورلىق تەننيسشى پوپكودان تاعى دا جەڭىلۋگە ءماجبۇر بولدى.

بۇل جولى ەكۆادورلىق سپورتشى ماتچتى جاقسى باستاعان ەدى. ول ءبىرىنشى سەتتە 6:3 باسىم ءتۇستى. ودان كەيىن ەكىنشى سەتتە دە 5:1 ەسەبىمەن العا شىعىپ، ماتچقا دوپ بەردى. بۇدان كەيىن دميتري پوپكو قاتارىنان بەس گەيمدى الدى. سودان كەيىن تاي-برەيكتە ءساتتى ويناپ، 7:6 (7:4) ەسەبىمەن ايلاسىن اسىردى.

ءۇشىنشى، شەشۋشى پارتيادا پوپكو 2:0، 3:1 ەسەبىمەن العا شىققانىمەن، باسىمدىعىن ساقتاي المادى. ەسەپ 3:3 بولىپ جاتقاندا ول تاعى ءبىر برەيك جاساپ، ەسەپتى 5:3-كە جەتكىزدى. الايدا ماتچقا دوپ بەرگەنىمەن، سول مۇمكىندىگىن پايدالانبادى. دەگەنمەن ويىندى برەيكپەن اياقتاي الدى. قورىتىندى ەسەپ – 6:4.

ماتچ وتە تارتىستى جانە قىزىقتى بولدى. ول ءۇش ساعاتقا جۋىق سوزىلدى.

وسىلايشا، دميتري پوپكو اقش-تىڭ فلوريدا شتاتىندا قاتارىنان ءۇش جارىستىڭ جەڭىمپازى بولدى.

داستان كەنجالين،

استانا