Tennısshi Dmıtrıı Popko AQSh ITF týrnıriniń jeńimpazy atandy

Tennısshi Dmıtrıı Popko AQSh-tyń Naples qalasynda ótken ITF týrnıriniń jeńimpazy atandy.

Ol fınalda dúnıejúzilik reıtıngide 649-orynda turǵan ekvadorlyq Andres Andrademen kúsh synasyp, ony 3:6, 7:6 (7:4), 6:4 esebimen jeńdi.

Bul ekeýi jaqynda Palm-Koýst qalasyndaǵy dál osyndaı jarystyń fınalynda oınaǵan edi. Sol kezde Popko qarsylasyn 7:5, 1:6, 7:5 esebimen jeńgen bolatyn. Endi ekvadorlyq tennısshi Popkodan taǵy da jeńilýge májbúr boldy.

Bul joly ekvadorlyq sportshy matchty jaqsy bastaǵan edi. Ol birinshi sette 6:3 basym tústi. Odan keıin ekinshi sette de 5:1 esebimen alǵa shyǵyp, matchqa dop berdi. Budan keıin Dmıtrıı Popko qatarynan bes geımdi aldy. Sodan keıin taı-breıkte sátti oınap, 7:6 (7:4) esebimen aılasyn asyrdy.

Úshinshi, sheshýshi partııada Popko 2:0, 3:1 esebimen alǵa shyqqanymen, basymdyǵyn saqtaı almady. Esep 3:3 bolyp jatqanda ol taǵy bir breık jasap, esepti 5:3-ke jetkizdi. Alaıda matchqa dop bergenimen, sol múmkindigin paıdalanbady. Degenmen oıyndy breıkpen aıaqtaı aldy. Qorytyndy esep – 6:4.

Match óte tartysty jáne qyzyqty boldy. Ol úsh saǵatqa jýyq sozyldy.

Osylaısha, Dmıtrıı Popko AQSh-tyń Florıda shtatynda qatarynan úsh jarystyń jeńimpazy boldy.

Dastan KENJALIN,

ASTANA