وليمپيادا كيىمىنىڭ ديزاينىنا اشىق كونكۋرس جاريالاندى

تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ سپورتتى دامىتۋ ديرەكتسياسى بيىل پاريجدە وتەتىن جازعى وليمپياداعا ارنالعان قازاقستان ۇلتتىق قۇراماسىنىڭ كيىم فورماسى مەن وعان قوسىمشا كەرەك-جاراق جابدىقتاردىڭ ديزاين تۇجىرىمداماسىن ازىرلەۋگە ارنالعان اشىق كونكۋرس جاريالانعانىن حابارلادى.

كيىمدەر سالتاناتتى راسىمگە جانە جاتتىعۋعا ارنالعان جۇپتان تۇرادى. كونكۋرس كەزىندە كەلىپ تۇسكەن جۇمىستاردى ارنايى كوميسسيا قۇرامى قاراپ، ورتاق شەشىم قابىلدايدى. جۇمىس توبىنىڭ قاتارىنا تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتى، ۇلتتىق وليمپيادا كوميتەتى، قازاقستان سپورتشىلارى وداعىنىڭ وكىلدەرى، داڭقتى سپورتشىلارىمىز بەن باق قىزمەتكەرلەرى كىرەدى. بۇل قاتاردا ەلدوس سمەتوۆ، سەرىك ساپيەۆ، ازامات داۋلەتبەكوۆ، ءجاميلا باقبەرگەنوۆا، ولگا رىپاكوۆا، ءابيبا ابۋجاقىنوۆا، اننا اليابەۆا، نۇربەك ورالباي، نۇرسۇلتان تۇرسىنوۆتى اتاپ وتۋگە بولادى. كوميسسيا توراعاسى – سپورتتى دامىتۋ ديرەكتسياسىنىڭ ديرەكتورى ەرلان ەستەك، — دەلىنگەن حابارلامادا.

كونكۋرس ەكى كەزەڭگە سوزىلادى. ءاربىر كەزەڭنىڭ جەڭىمپازى ەرەجە شارتتارىنا سايكەس كوميسسيا وتىرىسىندا انىقتالادى.

ءبىرىنشى كەزەڭدە، ياڭني 28 اقپاننان ساعات 20:00-دەن باستاپ 10 ناۋرىزعا ساعات 18:30 دەيىن كوميسسيا كونكۋرسقا قاتىسۋشىلار وتىنىشتەرىن، ماتەريالدارىن قابىلداپ، قارايدى.

ەكىنشى  كەزەڭدە كونكۋرس جەڭىمپازدارى انىقتالىپ، جاريالانادى. ەكىنشى كەزەڭ 13-15 ناۋرىز ارالىعىندا بولادى.

كونكۋرسقا قاتىسۋشىلارعا ءتۇسىندىرۋ جۇمىسىنا جانە جالپى كونكۋرس وتكىزۋگە تسم سپورت جانە دەنە شىنىقتىرۋ كوميتەتى سپورتتى دامىتۋ ديرەكتسياسىنىڭ مەملەكەتتىك ساتىپ الۋ ءبولىمىنىڭ باستىعى ەرجان اسقاروۆ جاۋاپتى. بارلىق اقپاراتتى تومەندەگى سىلتەمەلەر ارقىلى الۋعا بولادى.

كونكۋرس ەرەجەسى مەن كوميسسيا قۇراما مىنا جەردە.

ۇوك كومانداسىنىڭ كيىم فورماسىنا قاتىستى بىرىڭعاي نۇسقاۋلىق مىنا جەردە.