ەلىمىزدىڭ موتوسپورت كومانداسى الەم چەمپيوناتىنا قاتىسادى

بىلتىر ۇلتتىق موتوسپورت تاريحىندا العاش رەت Uniserv Moto82 موتوتسيكل جارىستارىنىڭ كومانداسى EWC24 حالىقارالىق جارىسىنا الەمنىڭ ۇزدىك جيىرما كومانداسىنىڭ قاتارىنان كورىندى.  قازاقستان كومانداسىنىڭ بۇل جەتىستىگى الەم ماماندارىنىڭ نازارىن اۋداردى، دەپ حابارلادى اۆتوموتوسپورت فەدەراتسياسى.

Uniserv Moto82 كومانداسىنىڭ باس دەمەۋشىسى — باتىس قازاقستان وبلىسىنداعى Uniserv كومپانياسى.  كومپانيانىڭ قۇرىلتايشىسى نۇرعازى ساتباەۆ ۇلتتىق موتوسپورتتى، اتاپ ايتقاندا ewc24 فورماتىنداعى جول جارىسىن دامىتۋدى قولدايدى. EWC-بۇل جول موتوجارىسىنىڭ 6-دان 24 ساعاتقا دەيىنگى توزىمدىلىككە ارنالعان الەمدىك ءتۋرنيرى.

ەندى  Uniserv Moto82 كومانداسى  بيىل فرانتسيا، بەلگيا مەن جاپونيادا وتەتىن ايتۋلى (EWC 24) جارىسقا قاتىسۋدى جوسپارلاپ وتىر.

وسىعان وراي بۇگىن الماتىداعى  قازاق سپورت جانە تۋريزم اكادەمياسىندا ءباسپاسوز ءماسليحاتى بولىپ، وندا الەم چەمپيوناتى مەن ەلىمىزدەگى اۆتوموتوسپورتتىڭ جاعداي تۋرالى اڭگىمە بولدى. وعان اۆتوموتوسپورت فەدەراتسياسىنىڭ پرەزيدەنتى م. ابىقاەۆ، Uniserv جشس قۇرىلتايشىسى ن.ساتباەۆ، Uniserv moto82 كومانداسىنىڭ مەنەدجەرى كارل پەشەك، يوزەف كۋبيچەك، Uniserv Moto82 كومانداسىنىڭ موتوشاباندوزدارى كارل پەشەك، دميتري پريسكوكو، مارتين ۆاشۋلين قاتىستى.  موتوسپورتشى كارل پەشەك — Uniserv moto82 كومانداسىنىڭ مەنەدجەرى كارل پەشەكتىڭ بالاسى.

جيىندا كوماندانىڭ بيىلعا جوسپارى مەن مىندەتتەرى، Uniserv Moto82 كومانداسىنىڭ جارىسقا دايىندىق كەزەڭى قارالدى.