بەلگىلى جۋرناليست رابات جانىبەكوۆ ومىردەن ءوتتى

قازاق جۋرناليستيكاسىنىڭ ارداگەرى، قازاق تەلەۆيزياسى مەن راديوسىنا ءوز قولتاڭباسىن قالدىرعان بەلگىلى سپورت ءجۋرناليسى رابات جانىبەكوۆ ومىردەن ءوتتى.

رابات الىبەك ۇلى 1942 جىلى 27 ماۋسىمدا قازىرگى تۇركىستان وبلىسى، قازىعۇرت اۋدانى رابات اۋىلىندا تۋعان. ول سانالى عۇمىرىن قازاق تەلەۆيزياسىنا ارناپ، قازاق تىلىندە سپورت رەپورتاجىن جۇرگىزگەن كوممەنتاتور بولدى.

مەكتەپتى بىتىرگەننەن سوڭ قازىرگى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە ءتۇستى. ۋنيۆەرسيتەتتە ءبىلىم الىپ، جەڭىل اتلەتيكا، ەركىن كۇرەس، ۆەلوسپورتتان كاسىبي تۇرعىدا اينالىستى. ۆەلوشاباندوز بولىپ، وبلىس جۇلدەگەرى اتاندى.

1968 جىلى «قازاقستان» ۇلتتىق تەلەارناسىنداعى «قۇرداستار» بالالار مەن جاسوسپىرىمدەر حابارىندا ەڭبەك جولىن باستادى. ول العاش رەت قازاق دالاسىنىڭ ءۇنى بولعان «قازاق راديوسىندا» اسكەري-پاتريوتتىق رەداكتسياسىنىڭ قازاق تىلىندەگى حابارلارى اشىلىپ، سونىڭ رەداكتورى بولدى. قازاق تەلەۆيزياسىندا 2003 جىلعا دەيىن رەداكتور بولىپ قىزمەت ەتتى.

1972 جىلى الماتىداعى ورتالىق اسكەري شتاب اشىلىپ، وندا اسكەري جانە سپورت حابارلارىنىڭ جۇرگىزۋشىسى قىزمەتىنە شاقىرىلدى.

1973 جىلدان باستاپ تەلەارنانىڭ سپورت بولىمىنە اۋىسىپ، كوممەنتاتورلىق جۇمىستى اتقاردى. رابات الىبەك ۇلى العاش رەت 1972 جىلى فۋتبولدان كسرو چەمپيوناتىنداعى الماتىنىڭ «قايرات» كلۋبى مەن ماسكەۋدىڭ «تورپەدو» كومانداسىنىڭ ماتچىن جۇرگىزدى.

1980 جىلى ماسكەۋ وليمپياداسىندا كوگالداعى حوككەيدەن تىكەلەي رەپورتاج، بۇدان باسقا ايەلدەر اراسىندا ۆولەيبولدان ەۋروپا چەمپيوناتىن ميلليونداعان جانكۇيەرگە جەتكىزدى.

2004 جىلدان بەرى ءبىلىم جانە عىلىم مينيسترلىگىنىڭ عىلىمي-پراكتيكالىق ورتالىعىندا ءباسپاسوز حاتشىسى بولدى.

رابات جانىبەكوۆ سپورت جۋرناليستيكاسىندا تالاي شاكىرت تاربيەلەدى. 2001 جىلدان 2012 جىلعا دەيىن الماتىداعى قازاق سپورت جانە تۋريزم اكادەمياسىندا سپورت جۋرناليستيكاسى فاكۋلتەتىندە شاكىرتتەرگە ساباق بەردى. ءبىرتالاي تالانتتى سپورت جۋرناليستەرىن دايىندادى. قازىر ولار ەسىمى ەلگە تانىمال سپورت ءجۋرناليسى بولىپ ءجۇر.

SportPress.kz اقپاراتتىق-ساراپتامالىق سپورت سايتىنىڭ رەداكتسياسى قازاق سپورت جۋرناليستيكاسىنىڭ بايتەرەگى رابات جانىبەك ۇلىنىڭ قازاسىنا قايعىرىپ، مارقۇمنىڭ تۋعان-تۋىستارى مەن باسقا دا جاقىندارىنا كوڭىل ايتادى.