SportPress.kz Qazaqstan sport jańalyqtary
Qazaq jýrnalıstıkasynyń ardageri, qazaq televızııasy men radıosyna óz qoltańbasyn qaldyrǵan belgili sport jýrnalısi Rabat Jánibekov ómirden ótti.
Rabat Álibekuly 1942 jyly 27 maýsymda qazirgi Túrkistan oblysy, Qazyǵurt aýdany Rabat aýylynda týǵan. Ol sanaly ǵumyryn qazaq televızııasyna arnap, qazaq tilinde sport reportajyn júrgizgen kommentator boldy.
Mektepti bitirgennen soń qazirgi Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetine tústi. Ýnıversıtette bilim alyp, jeńil atletıka, erkin kúres, velosporttan kásibı turǵyda aınalysty. Veloshabandoz bolyp, oblys júldegeri atandy.
1968 jyly «Qazaqstan» ulttyq telearnasyndaǵy «Qurdastar» balalar men jasóspirimder habarynda eńbek jolyn bastady. Ol alǵash ret qazaq dalasynyń úni bolǵan «Qazaq radıosynda» áskerı-patrıottyq redakııasynyń qazaq tilindegi habarlary ashylyp, sonyń redaktory boldy. Qazaq televızııasynda 2003 jylǵa deıin redaktor bolyp qyzmet etti.
1972 jyly Almatydaǵy ortalyq áskerı shtab ashylyp, onda áskerı jáne sport habarlarynyń júrgizýshisi qyzmetine shaqyryldy.
1973 jyldan bastap telearnanyń sport bólimine aýysyp, kommentatorlyq jumysty atqardy. Rabat Álibekuly alǵash ret 1972 jyly fýtboldan KSRO chempıonatyndaǵy Almatynyń «Qaırat» klýby men Máskeýdiń «Torpedo» komandasynyń matchyn júrgizdi.
1980 jyly Máskeý Olımpıadasynda kógaldaǵy hokkeıden tikeleı reportaj, budan basqa áıelder arasynda voleıboldan Eýropa chempıonatyn mıllıondaǵan jankúıerge jetkizdi.
2004 jyldan beri Bilim jáne ǵylym mınıstrliginiń ǵylymı-praktıkalyq ortalyǵynda baspasóz hatshysy boldy.
Rabat Jánibekov sport jýrnalıstıkasynda talaı shákirt tárbıeledi. 2001 jyldan 2012 jylǵa deıin Almatydaǵy Qazaq sport jáne týrızm akademııasynda sport jýrnalıstıkasy fakýltetinde shákirtterge sabaq berdi. Birtalaı talantty sport jýrnalısterin daıyndady. Qazir olar esimi elge tanymal sport jýrnalısi bolyp júr.
SportPress.kz aqparattyq-saraptamalyq sport saıtynyń redakııasy qazaq sport jýrnalıstıkasynyń báıteregi Rabat Jánibekulynyń qazasyna qaıǵyryp, marqumnyń týǵan-týystary men basqa da jaqyndaryna kóńil aıtady.
