قفف ءبىرىنشى ۆيتسە-پرەزيدەنتى قىزمەتىنەن كەتتى

قازاقستان فۋتبول فەدەراتسياسىنىڭ ءبىرىنشى ۆيتسە-پرەزيدەنتى ولجاس ابراەۆ باسقا جۇمىس ورنىنا اۋىسۋىنا بايلانىستى ءوز قىزمەتىنەن كەتتى.

ول Sport Plus Qazaqstan مەديا-توبىنىڭ باس ديرەكتورى قىزمەتىنە سايلاندى. سونىمەن قاتار، ولجاس ابراەۆتىڭ قازاقستان فۋتبولىنداعى مول تاجىريبەسىن ەسكەرە وتىرىپ، قفف حالىقارالىق جوبالارى بويىنشا قازاقستان فۋتبول فەدەراتسياسى پرەزيدەنتىنىڭ كەڭەسشىسى رەتىندە قىزمەتىن جالعاستىرادى.

ولجاس ابراەۆ بۇعان دەيىن قازاقستان فۋتبول فەدەراتسياسىنىڭ باس حاتشىسى، اتقارۋشى حاتشىسى، «قازاقستان كاسىپقوي فۋتبول ليگاسى قاۋىمداستىعى» زاڭدى تۇلعالار بىرلەستىگىنىڭ پرەزيدەنتى، ۇلتتىق فۋتبول ليگاسىنىڭ ديرەكتورى مەن باسقا دا قىزمەتتە جۇمىس ىستەدى.

2013 جىلدان باستاپ ۋەفا ماتچتارىنىڭ دەلەگاتى قىزمەتىن اتقارىپ كەلەدى. ال 2016 جىلدان باستاپ فيفا ماتچتارىنىڭ كوميسسارى. سونىمەن قاتار ۋەفا-نىڭ ماركەتينگ بويىنشا كونسۋلتاتيۆتى كەڭەسىنىڭ مۇشەسى.

ۋەفا دەلەگاتى – ماتچتى ۇيىمداستىرۋعا جاۋاپتى، قاۋىپسىزدىك سۇراقتارى مەن جارىستىڭ ءتارتىبىن ساقتاۋدى باقىلايتىن ۋەفا-نىڭ رەسمي وكىلى.

داستان كەنجالين،

استانا