اۋەدە قالقىعان سايىپقىرانداردىڭ ۇزدىكتەرى انىقتالدى

اسەم قالا الماتىنىڭ شىمبۇلاق تاۋ بوكتەرىندە «موگۋل»، «پاراللەل موگۋل» جانە «شاڭعى اكروباتيكاسى» باعىتتارى بويىنشا فريستايلدان FIS الەم كۋبوگىنىڭ فينالدىق كەزەڭدەرى ءوز مارەسىنە جەتتى.

ءۇش كۇنگە سوزىلعان سايىستى تۋريزم جانە سپورت مينيسترلىگى، الماتى قالاسى اكىمدىگى، سپورتتى دامىتۋ ديرەكتسياسى،  «قازاقستان رەسپۋبليكاسىنىڭ ۇلتتىق وليمپيادا كوميتەتى» بق، «سامۇرىق قازىنا» اق، «تۋريزم جانە سپورت يندۋسترياسىن قولداۋ قورى» ۇجىمدىق قورى، «قازاقستان رەسپۋبليكاسىنىڭ ۇلتتىق شاڭعى اسسوتسياتسياسى» بزت فا، «شىمبۇلاق» تك ۇيىمداستىرسا، سونداي-اق باس سەرىكتەستەر «سامۇرىق قازىنا» اق، Sport Qory جانە ءىس-شارانىڭ دەمەۋشىلەرى Mastercard تولەم جۇيەسى جانە «Jusan Bank» بانكى دەمەۋشىلىك جاسادى. كورەرمەندەر ءۇش كۇن بويى سايىستى تاماشالاپ، ال ءوز كەزەگىندە الەمنىڭ فريستايل جۇلدىزدارى وزدەرىنىڭ ونەرلەرى مەن شەبەرلىكتەرىن كورسەتتى.

سايىستارعا 16 ەلدىڭ حالىقارالىق دەڭگەيدەگى 100-دەن استام سپورتشىسى قاتىستى. قازاقستاننىڭ اتىنان 15 سپورتشى شىقتى. «موگۋل/پاراللەل موگۋل» باعىتىندا 10 اتلەت، «شاڭعى اكروباتيكاسى» باعىتىندا 5 اتلەت باق سىناعان جارىس تارتىستى دا شيەلەنىستى وتكەنىن كۋاگەر بولدىق. الدىمەن  «موگۋل» باعىتى بويىنشا سايىستار ءوتىپ، ەرلەر اراسىندا كانادالىق كينگسبۋري ميكاەل جەڭىمپاز اتاندى. ايەلدەر اراسىنداعى سايىستا اۆستراليالىق ەنتوني دجاكارا ەشكىمگە دەس بەرمەدى.  سونداي-اق اتالعان باعىت بويىنشا مەزگىلدىڭ قورىتىندىسى بويىنشا سپورتشىلار ماراپاتتالدى. جالپى ەسەپتە ءبىرىنشى ورىننىڭ جانە كىشى حرۋستال گلوبۋستىڭ يەگەرلەرى جاپونيالىق يكۋما حيروشيما مەن اۋستراليالىق ەنتوني دجاكارا بۇل اتاققا يە بولدى.

«پاراللەل موگۋل» باعىتىندا الەمنىڭ ۇزدىك اتلەتتەرىنىڭ ناعىز تارتىستى دەڭگەيدە ءوربىدى. وتانداسىمىز پاۆەل كولماكوۆ ۇلكەن فينالعا ءوتىپ، سول جاقتا عانا اتاقتى كانادالىق فريستايلشى كينگسبەري ميكاەلدەن ارتتا قالىپ، الەم كۋبوگى كەزەڭىنىڭ كۇمىس جۇلدەگەرى اتاندى. ايەلدەر باسەكەسىندە اۆستراليالىق ەنتوني دجاكارا تاعى دا ەشكىمگە دەس بەرمەي، تۇعىردىڭ بيىك ساتىسىنان كورىنە ءبىلدى.

فريستايل سايىستارىنىڭ سوڭعى كۇنىندە «شاڭعى اكروباتيكاسى» باعىتى بويىنشا جەڭىمپازدان ىرىكتەۋ كەزەڭىندەگى ءجۇرىپ وتۋلەردىڭ قورىتىندىسى بويىنشا انىقتالدى. وعان اۋا رايىنىڭ كۇرت قۇبىلۋى سەبەپ بولدى (قاتتى تۇمان جانە سپورتشىلاردىڭ سەكىرۋگە مۇمكىندىكتەرىنىڭ بولماۋى). ىرىكتەۋدىڭ قورىتىندىسى بويىنشا ەرلەر اراسىندا قىتايلىق تسي گۋاڭپۋ، ايەلدەردەن كانادالىق زەناۋلت مەريون جەڭىمپاز دەپ ەسەپتەلىندى. جالپى ەسەپتە شاڭعى اكروباتيكاسى باعىتىندا ەرلەر اراسىندا قىتايلىق تسي گۋاڭپۋ، ال ايەلدەر اراسىندا اۆستاراليالىق دەنيەللا سكوتت جىلدىڭ حرۋستال گلوبۋستىڭ يەسى اتاندى. «جىلدىڭ جاڭا تۇلعاسى» اتاعىن ەرلەر اراسىندا  قىتايلىق جاڭ يفاڭ ، ال ايەلدەر اراسىندا امەريكاندىق تەسسيا تەنەر يەلەندى. ۇلت كۋبوگىن اقش كومانداسى جەڭىپ الدى.

نۇرلان قۇمار،

الماتى