استانادا بوتاي جىلقىسىنا ەسكەرتكىش قويۋ جانە اشىق اسپان استىنداعى مۋزەي اشۋ ۇسىنىلدى

استانادا 13 ناۋرىزدا رەسپۋبليكالىق JORYQ ات سپورتى فەدەراتسياسى مەن استانا قالاسى ۇلتتىق جانە وليمپيادالىق ات سپورتى تۇرلەرى فەدەراتسياسى اراسىندا مەموراندۋمعا قول قويىلدى، دەپ حابارلادى قالا اكىمدىگى.

قۇجاتقا رەسپۋبليكالىق JORYQ ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ پەن استانا قالاسى ۇلتتىق جانە وليمپيادالىق ات سپورتى تۇرلەرى فەدەراتسياسىنىڭ پرەزيدەنتى ەرلان كاناليموۆ قول قويدى.

مەموراندۋم 14 تارماقتان تۇرادى. ول ەكى فەدەراتسيا اراسىنداعى ارىپتەستىكتى، ىنتىماقتاستىقتى نىعايتۋدى جانە ات سپورتىن دامىتۋ مەن تانىمالدىعىن ارتتىرۋدى كوزدەيدى.

اتاپ ايتقاندا، تاراپتار بىرلەسە وتىرىپ ات سپورتىن ءتيىمدى دامىتۋعا باعىتتالعان باستامالارىنا قولداۋ كورسەتۋگە، قوستاناي جانە اداي جىلقىلارىنىڭ تۇقىمىن، جىلقى مالىنىڭ قولعا العاش ۇيرەتىلگەن بوتاي مادەنيەتىن ناسيحاتتاۋ كەزىندە بىرىگىپ جۇمىس ىستەگە كەلىستى.

تاراپتار استانا قالاسىنىڭ شاعىن ساياباقتارىنىڭ بىرىندە بوتاي جىلقىسىنا ەسكەرتكىش ورناتۋ جانە قوعامدىق كەڭىستىكتى سول تاقىرىپتا اباتتاندىرۋ مەن استانا قالاسىندا اشىق اسپان استىندا بوتاي مادەنيەتىنىڭ مۋزەيىن ۇيىمداستىرۋ بويىنشا بىرلەسىپ جۇمىس اتقارۋدى دا جوسپارلاپ وتىر.

سونىمەن قاتار، ەكى فەدەراتسيا ات سپورتىنا ۇلەس قوسقان ازاماتتاردى جىل سايىن قوشەمەتتەۋ جانە ماراپاتتاۋ سالتاناتتى شاراسىن ۇيىمداستىرىپ، جوعارى وقۋ ورىندارىمەن بىرلەسكەن شارالار وتكىزۋدى ماقسات ەتەدى.

وعان قوسا قازاق جىلقىسىن، ونىڭ قازاق تۇرمىسى مەن مادەنيەتىندەگى ورنىن ناسيحاتتاۋ جولىندا استانا قالاسىنداعى تەاترلاردىڭ بىرىندە ارنايى قويىلىم كورسەتۋ بويىنشا بىرلەسكەن جۇمىس تا قولعا الىنادى.

JORYQ رەسپۋبليكالىق ات سپورتى فەدەراتسياسى ۇلتتىق سپورت قاۋىمداستىعىنىڭ قۇرامىنا كىرەدى. ودان بولەك، قاۋىمداستىق قۇرامىندا بايگە، كوكپار، اۋدارىسپاق، جامبى اتۋ، تەڭگە ءىلۋ، قۇسبەگىلىك، ءداستۇرلى ساداق اتۋ، اسىق اتۋ، توعىزقۇمالاق سياقتى فەدەراتسيالار بار.

ۇلتتىق سپورت قاۋىمداستىعىن بەلگىلى كاسىپكەر، مەتسەنات، Altyn Qyran Foundation قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.