تاەكۆوندوشى اباباكيروۆ وليمپيادا ليتسەنزياسىن الدى

تاەكۆوندوشى ساميرحون اباباكيروۆ (58 كگ) قىتايدىڭ تايان قالاسىندا ءوتىپ جاتقان ليتسەنزيالىق تۋرنيردە پاريج وليمپياداسىنىڭ جولداماسىنا يە بولدى.

جارتىلاي فينالدا ول فيليپپين وكىلى كۋرت بريان باربوسانى ايقىن باسىمدىقپەن جەڭدى.

ۇلتتىق قۇرامانىڭ سپورتشىسى ەكى راۋندتا ءىرى ەسەپپەن جەڭىسكە جەتتى. ەسەپ – 2:0.

وعان دەيىن ساميرحون اباباكيروۆ نۇرحان ساميدينوۆتى (قىرعىزستان)، ودان كەيىن تاناكريت يودراكتى (تايلاند) جەڭگەن بولاتىن.

بۇل — تاەكۆوندودان ۇلتتىق قۇرامانىڭ پاريج وليمپياداسىنا العان ەكىنشىسى جولداماسى. بۇدان بۇرىن باتىرحان تولەۋعالي (-80 كگ) العاش بولىپ ليتسەنزيانى يەلەنگەن ەدى.

وكىنىشكە قاراي، جولداماعا تالاسقان اسا اۋىر سالماقتاعى جانسەل دەنيز (+67 كگ) مۋنيرا ابدۋساليموۆادان (تاجىكستان) جەڭىلىپ قالدى.

وسى تۋرنيرگە ءۇش جولداما الامىز دەپ كەلگەنبىز. قولعا تۇسكەنى ەكەۋ بولدى. ءبىر قۋانىشتىسى پاريجگە قوس جاس تاەكۆوندوشىمىز بارادى. باتىرحان شىلدەدە 18-گە، ساميرحون قىركۇيەكتە 21-گە تولادى. جىل وتكەن سايىن ۇلتتىق قۇراما ساپىنا كوپتەپ جاستاردى تارتىپ كەلەمىز. ءبىز تاجىريبەلى جانسەل دەنيزدەن ليتسەنزيا كۇتكەنبىز. الايدا ول قارسىلاسىنان جەڭىلىپ قالدى. جانسەل يسپانيادا وتكەن 12 كۇندىك حالىقارالىق وقۋ-جاتتىعۋ جيىنى كەزىندە تىزەسىنەن جاراقات العان. ەكى جەكپە-جەك كەزىندە سونىڭ سالدارى كورىنىپ تۇردى، — دەدى قازاقستان تاەكۆوندو فەدەراتسياسىنىڭ باس حاتشىسى ولجاس بەسپاەۆ سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

ازيانىڭ شەشۋشى تۋرنيرىنە 33 ەلدەن 96 اتلەت قاتىستى. مۇنداعى جەكپە-جەكتەر كەزىندە بۇرا تارتۋ بولماس ءۇشىن ەۋروپا، افريكا جانە وڭتۇستىك امەريكادان كەلگەن تورەشىلەر قىزمەت ەتتى. ولار ەندى پارا تاەكۆوندودان ليتسەنزيالىق تۋرنيردە جۇمىسىن جالعاستىرادى.

جالپى، قازاقستان قۇراماسى 2004 جىلدان بەرى تۇراقتى تۇردە وليمپياداعا تاەكۆوندوشى اپارادى. افينادا ەل نامىسىن تەك ءادىلحان ساعىندىقوۆ قانا قورعاعان. سودان كەيىن بەيجىڭدە ارمان شىلمانوۆ پەن ليا نۋركينا، لوندوندا نۇرسۇلتان ماماەۆ، گۇلنافيس ايتمۇحامبەتوۆا، فەرۋزا ەرگەشوۆا سىنعا ءتۇستى. ال ريو (رۋسلان جاپاروۆ، اينۇر ەسبەرگەنوۆا) مەن توكيوداعى ويىنداردا (رۋسلان جاپاروۆ، جانسەل دەنيز) ەكى تاەكۆوندوشىمىز جۇلدەگە تالاسقان. ازىرگە قازاقستان ەنشىسىندە بەيجىڭدەگى ارمان شىلمانوۆتىڭ قولا جۇلدەسى بار.

شامكەن بايىربەك،

تايان، قىتاي