قازاق ءجۋرناليسى چيكاگو مارافونىنا قاتىستى

بەلگىلى جۋرناليست، كاسىپكەر ەرەنعايىپ قۋاتاي ۇلى اقش-تىڭ چيكاگو قالاسىندا وتكەن مارافونعا قاتىستى.

بيىل ول ءساۋىر ايىندا بوستون قالاسىندا جۇگىرۋدەن وتكەن جارىسقا قاتىسقان بولاتىن. ەندى مىنە، ول اتلانت مۇحيتىنىڭ ار جاعىندا جاتقان الىپ ەلدە ۇيىمداستىرىلعان تاعى ءبىر مارافوندا باق سىناپ كوردى.

ونىڭ ايتۋىنشا، مارافونعا 40 مىڭ ادام قاتىستى. سولاردىڭ جارىسىن 1 700 000 جانكۇيەر تىكەسىنەن تىك تۇرىپ قولداپ تۇردى. ول جارىستىڭ قالاي باستالعانى تۋرالى بىلاي دەدى:

ساۋىردە بوستوندا باستالعان مەيجور مارافون كەشە چيكاگودا جالعاستى.

… قىرىق مىڭ جىلقى سۋ ىشسە لايلانباس

نيازدىڭ ايۋلى مەن قارا-اي كولى، –  دەپ ءيمانجۇسىپ سەرى جىرلاعانداي، 40 مىڭ مارافونشى جۇگىرسە دە چيكاگو كوشەسىنىڭ شاڭى شىقپاس!

40 مىڭ مارافونشىنى 1 700 000 جانكۇيەر تىكەسىنەن تىك تۇرىپ قولداپ تۇردى.

بىزگە دە كەرەگى وسى قيقۋ. ابىلايدىڭ اسىندا شاپپاعاندا اتاڭنىڭ باسىندا شاباسىڭ با دەمەكشى، مۇنداي قيقۋدا ارقاڭ قوزباي كورسىن! ونىڭ ۇستىنە اۋا-رايى دا قولايلى بولدى. تراسسا دا تاقتايداي تەگىس…

وق اتىلدى. ەليتا وقشا اتىلدى! سوسىن قىزىل جولاقتاعى ا ساناتىنىڭ اۋزىمەن قۇس تىستەگەن جۇيرىكتەرى كەتتى. ىلە-شالا 2:50-3:15 ۋاقىتتا كومبەگە كەلەتىن ۆ ساناتىنىڭ كوشىن باستاپ ءبىز دە تىزگىندى جىبەردىك…، –  دەدى ەرەنعايىپ قۋاتاي ۇلى.

وسىدان كەيىن جۋرناليست مارافوننىڭ 35-شاقىرىمنان كەيىنگى جاعدايدى بىلاي دەپ باياندادى:

مارافون 35-شاقىرىمنان كەيىنگى باستالادى دەگەن ۇعىم بار. مىنە، 35-كم باستالدى. اۋەلگى تەمپ وزگەرگەن جوق! اياق الىسىم جاقسى. جۇرەك قاعىسىم ودان دا جاقسى! كەيدە «بۇل مارافون قاشان اياقتالادى» دەگەن جامان وي دا بولاتىن. ال بۇل جولى «اتپاسا ەكەن تاڭى دا» دەگەندەي بولدى!

ستارتتان فينيشكە دەيىن ءبىر قالىپتى جۇگىردىم. 42.2 كم بويى 4:00 دەگەن تەمپتى ۇستاپ وتىردىم. ياكي، ءار 4 مينۋت سايىن –  ءبىر كم.

گارمين ستاتيستيكاسى بىلاي دەيدى: العاشقى 10 كم 40 مينۋت، 20 كم 80 مينۋت، 30 كم 121 مينۋت، 40 كم 162 مينۋت…، –  دەدى كاسىپكەر.

وسى مارافوندا ەرەنعايىپ قۋاتاي ۇلى مارەگە 2 ساعات 49 مينۋتتا جەتتى. بۇل – ونىڭ ءوز رەكوردى. الايدا چيكاگو مارافونىنىڭ رەسمي حاتتاماسى 2 ساعات 51 مينۋت 10 سەكۋندتى كورسەتتى. ونىڭ ايتۋىنشا، مارافونشىلار تراسسانىڭ 800 مەتر ارتىق ەكەنىن، ياعني 43 كم بولعانىن ايتىپ جاتتى. ءسويتىپ، ول تۋرا 42 كم 200 مەترگە تولعاندا ساعاتىن توقتاتىپ، ءارى قاراي 800 م جۇگىرگەن.

مارافوندا ونىڭ ناتيجەسى 2 ساعات 51 مينۋت بولىپ تىركەلگەن.

قالاي بولعاندا دا رەسمي دەرەككە باعىنامىز. ءدال قازىر 2:49 نەمەسە 2:51 ناتيجەسى مەن ءۇشىن بىردەي. ەڭ باستىسى كەلەسى جىلعى نيۋ-يورك مارافونىنا قاتىسۋ ءۇشىن كۆاليفيكاتسياعا قول جەتتى! ەندى 2:45 دەگەن بەرلين مارافونىنىڭ كۆاليفيكاتسياسىنا جۇمىس ىستەۋ كەرەك! چيكاگو ناتيجەسى قامالى بەرىك بەرليننىڭ دە الىناتىنىنا ءۇمىت سىيلادى! ناتيجەنىڭ كوكەسى وسى! ساۋىردە عانا ءوزىمنىڭ ۇزدىك ناتيجەمە بالانعان بوستون مارافونىنىڭ 2:58 ۋاقىتى جاڭارعانى، ارينە جاقسى. بوستوننان كەيىن 35 كم ەكى جانە 17 كم ءبىر ترەيل، ءۇش جارتى مارافون (21.1 كم)، 10 كم ەكى جارىس، ءبىر جارتى ايرونمەن، Ocaenman، Pikeman (3،6 كم ءجۇزۋ)، 32 كم ۆەلو جارىستار چيكاگودا ءوز ناتيجەسىن بەردى. چيكاگو الدىندا ىستىق كول جاعاسىنداعى 10 كۇندىك جاتتىعۋدىڭ دا ەففەكتىسى كوپ بولدى!

سوزبەن ايتۋ مۇمكىن ەمەس عاجايىپ ەموتسياعا تولى مارافون بولدى، –  دەدى ول.

مارافونشى جارىسقا موتيۆاتسيا بەرىپ، ايىرىقشا كوڭىل بولگەن جاتتىقتىرۋشىسى ميحايل كراسيلوۆقا العىس ايتتى.

داستان كەنجالين،

استانا