SportPress.kz Qazaqstan sport jańalyqtary
Belgili jýrnalıst, kásipker Erenǵaıyp Qýataıuly AQSh-tyń Chıkago qalasynda ótken marafonǵa qatysty.
Bıyl ol sáýir aıynda Boston qalasynda júgirýden ótken jarysqa qatysqan bolatyn. Endi mine, ol Atlant muhıtynyń ar jaǵynda jatqan alyp elde uıymdastyrylǵan taǵy bir marafonda baq synap kórdi.
Onyń aıtýynsha, marafonǵa 40 myń adam qatysty. Solardyń jarysyn 1 700 000 jankúıer tikesinen tik turyp qoldap turdy. Ol jarystyń qalaı bastalǵany týraly bylaı dedi:
Sáýirde Bostonda bastalǵan meıjor marafon keshe Chıkagoda jalǵasty.
… Qyryq myń jylqy sý ishse laılanbas
Nııazdyń Aıýly men Qara-aı kóli, – dep Imanjúsip seri jyrlaǵandaı, 40 myń marafonshy júgirse de Chıkago kóshesiniń shańy shyqpas!
40 myń marafonshyny 1 700 000 jankúıer tikesinen tik turyp qoldap turdy.
Bizge de keregi osy qıqý. Abylaıdyń asynda shappaǵanda atańnyń basynda shabasyń ba demekshi, mundaı qıqýda arqań qozbaı kórsin! Onyń ústine aýa-raıy da qolaıly boldy. Trassa da taqtaıdaı tegis…
Oq atyldy. Elıta oqsha atyldy! Sosyn qyzyl jolaqtaǵy A sanatynyń aýzymen qus tistegen júırikteri ketti. Ile-shala 2:50-3:15 ýaqytta kómbege keletin V sanatynyń kóshin bastap biz de tizgindi jiberdik…, – dedi Erenǵaıyp Qýataıuly.
Osydan keıin jýrnalıst marafonnyń 35-shaqyrymnan keıingi jaǵdaıdy bylaı dep baıandady:
Marafon 35-shaqyrymnan keıingi bastalady degen uǵym bar. Mine, 35-km bastaldy. Áýelgi temp ózgergen joq! Aıaq alysym jaqsy. Júrek qaǵysym odan da jaqsy! Keıde «bul marafon qashan aıaqtalady» degen jaman oı da bolatyn. Al bul joly «atpasa eken tańy da» degendeı boldy!
Starttan fınıshke deıin bir qalypty júgirdim. 42.2 km boıy 4:00 degen tempti ustap otyrdym. Iakı, ár 4 mınýt saıyn – bir km.
Garmın statıstıkasy bylaı deıdi: alǵashqy 10 km 40 mınýt, 20 km 80 mınýt, 30 km 121 mınýt, 40 km 162 mınýt…, – dedi kásipker.
Osy marafonda Erenǵaıyp Qýataıuly márege 2 saǵat 49 mınýtta jetti. Bul – onyń óz rekordy. Alaıda Chıkago marafonynyń resmı hattamasy 2 saǵat 51 mınýt 10 sekýndty kórsetti. Onyń aıtýynsha, marafonshylar trassanyń 800 metr artyq ekenin, ıaǵnı 43 km bolǵanyn aıtyp jatty. Sóıtip, ol týra 42 km 200 metrge tolǵanda saǵatyn toqtatyp, ári qaraı 800 m júgirgen.
Marafonda onyń nátıjesi 2 saǵat 51 mınýt bolyp tirkelgen.
Qalaı bolǵanda da resmı derekke baǵynamyz. Dál qazir 2:49 nemese 2:51 nátıjesi men úshin birdeı. Eń bastysy kelesi jylǵy Nıý-Iork marafonyna qatysý úshin kvalıfıkaııaǵa qol jetti! Endi 2:45 degen Berlın marafonynyń kvalıfıkaııasyna jumys isteý kerek! Chıkago nátıjesi qamaly berik Berlınniń de alynatynyna úmit syılady! Nátıjeniń kókesi osy! Sáýirde ǵana ózimniń úzdik nátıjeme balanǵan Boston marafonynyń 2:58 ýaqyty jańarǵany, árıne jaqsy. Bostonnan keıin 35 km eki jáne 17 km bir treıl, úsh jarty marafon (21.1 km), 10 km eki jarys, bir jarty aıronmen, Ocaenman, Pikeman (3,6 km júzý), 32 km velo jarystar Chıkagoda óz nátıjesin berdi. Chıkago aldynda Ystyq kól jaǵasyndaǵy 10 kúndik jattyǵýdyń da effektisi kóp boldy!
Sózben aıtý múmkin emes ǵajaıyp emoııaǵa toly marafon boldy, – dedi ol.
Marafonshy jarysqa motıvaııa berip, aıyryqsha kóńil bólgen jattyqtyrýshysy Mıhaıl Krasılovqa alǵys aıtty.
Dastan KENJALIN,
ASTANA
