ءبارىن جۋرناليستەر مەن بلوگەرلەر شەشەتىن بولسا، ءبىز نە ىستەپ ءجۇرمىز؟ – مىرزاعالي ايتجانوۆ

بيىل فرانتسيانىڭ استاناسى – پاريج قالاسىندا ءتورت جىلدا ءبىر اينالىپ كەلەتىن جازعى وليمپيالىق ويىندار شەرۋ تارتادى. ازىرشە وسى دۇرمەكتى دوداعا ەرلەر اراسىنداعى ۇلتتىق قۇرامانىڭ التى بوكسشىسى عانا جولداما الىپ قويدى. ەندى ءبىر ليتسەنزيانىڭ تاعدىرى تايلاندتىڭ استاناسى – بانگكوك قالاسىندا بولاتىن حالىقارالىق تۋرنيردە شەشىلەدى. بۇل جارىس 26 مامىر مەن 2 ماۋسىم ارالىعىندا جالاۋىن جەلبىرەتىپ تۇرادى.

قازىر ۇلتتىق قۇرامادا 63،5 كەلى سالماقتاعى بوكسشىنىڭ ليتسەنزياسى عانا بولماي تۇر. وسى سالماقتا سەرىك تەمىرجانوۆ، ەراسىل تاڭقاي، مۇحاممەدسابىر بازارباي ۇلى مەن ەرتۋعان زەينۋللينوۆ بار. بىراق بىلتىر ازيا ويىندارىندا ەرتۋعان زەينۋللينوۆ، جاقىندا يتاليادا وتكەن تۋرنيردە مۇحاممەدسابىر بازارباي ۇلى ليتسەنزيا الا الماي قالدى. ەندى باسقا سپورتشىلاردىڭ تايلاندتا وتەتىن تۋرنيردە وسى سالماق بويىنشا جولداما الۋعا مۇمكىندىك بولادى. سونىڭ ءبىرى — 67 كەلىگە دەيىنگى سالماقتا رينگكە شىعىپ جۇرگەن دۋلات بەكباۋوۆ.  ول سالماق قۋىپ، 63، 5 كەلىگە ءتۇسىپ، وليمپيادا جولداماسى ءۇشىن كۇش سىناسقىسى كەلەتىن كورىنەدى. ال ازىرشە وسى سىنعا قاي بوكسشىنىڭ قاتىساتىنى بەلگىسىز. وليمپيادا چەمپيونى باقتيار ارتاەۆ جۋرناليست اسلان قاجەنوۆتىڭ You tube-دەگى «سپورت ءمينيسترى» ارناسىنا بەرگەن سۇحباتىندا پاريجدەگى دوداعا دۋلات بەكباۋوۆتىڭ بارۋى ءتيىس ەكەنىن ايتتى.

مەنىڭ ويىمشا، دۋلات 100 پايىز وليمپياداعا بارۋى كەرەك. ول قارسىلاسىنىڭ قىر-سىرىن بىلە الادى، ابدەن تەكسەرىلگەن، شىڭدالعان بوكسشى. ول سالماعىن 63،5 كەلىگە تۇسىرسە، ونى ۇستاي الادى. سالماق قۋعا قيىندىق بولمايدى. مۇحاممەدسابىر بازارباي ۇلى، ەرتۋعان زەينۋللينوۆ  مەن دۋلات بەكباۋوۆ ءبىر-بىرىمەن سپاررينگ وتكىزۋى كەرەك. سوندا جەڭگەن بىلعارى قولعاپ شەبەرى ۇلتتىق قۇراماعا الىنىپ، ليتسەنزيا ءۇشىن تايلاندقا بارۋى ءتيىس، — دەدى ول.

ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ بولسا قازىر 63،5 كەلى سالماق توڭىرەگىندە اڭگىمەنىڭ كوبەيىپ كەتكەنىن،  ونى جۋرناليستەر مەن بلوگەرلەر دە كوبەيتىپ جىبەرگەنىن ەسكەرتتى. بۇل تۋرالى ول جۋرناليست سامات سۇلەيگە Facebook-تە ايتتى.

بىرىنشىدەن، دۋلاتتىڭ جەكە جاتتىقتىرۋشىسى وسى سالماققا اۋىساتىنى جايلى ءبىر اۋىز ءسوز ايتقان ەمەس. ەكىنشىدەن، ءبارىن جۋرناليستەر مەن بلوگەرلەر شەشەتىن بولسا، ءبىز ۇلتتىق قۇرامادا نە ىستەپ ءجۇرمىز؟ ۇشىنشىدەن، دۋلات بەكباۋوۆ ۇلتتىق قۇراما مۇشەسى. ەگەر 63،5 كەلىگە اۋىساتىن ويى بولسا، بىزگە كەلىپ ايتۋى كەرەك. جارىستارعا وسى سالماقتا قاتىسۋى كەرەك. ەگەر مۇنداي نيەتتەرى بولسا، قۇراما جاتتىقتىرۋشىلارىنا ايتۋى ءتيىس. سودان سوڭ، ءبىز وسى سالماقتاعى بوكسشىلارمەن جۇدىرىقتاستىرىپ، ءبارىن باعامدايمىز. دۋلات پەن ونىڭ جاتتىقتىرۋشىسى ماعان بۇل ويى تۋرالى ايتقان جوق. ۇلتتىق قۇراما مۇشەسىنە، ەگەر سالماق اۋىستىراتىن بولسا، تىكەلەي كەلىپ اقىلداسۋىنا ەش كەدەرگى جوق. ال جارىسقا ەكى اي قالعاندا مۇنداي اڭگىمە ايتۋ ويعا قونبايدى، – دەدى مىرزاعالي ايتجانوۆ.

ۇلتتىق قۇرامانىڭ باس جاتتىقتىرۋشىسى 26 مامىر مەن 2 ماۋسىم ارالىعىندا بانگكوكتە سوڭعى ليتسەنزيالىق ءتۋرنيردىڭ بولاتىنىن، ازىرشە  وعان 63،5 كەلى سالماقتان كىمنىڭ باراتىنى بەلگىسىز ەكەنىن، بوكسشىلاردىڭ اراسىندا ىرىكتەۋ ءوتىپ، ەڭ مىقتىسى عانا جارىسقا جىبەرەلەتىنىن ايتتى.

داستان كەنجالين،

استانا