باس جۇلدە قانجىعامىزعا بايلاندى

اسساليامۋالەيكۋم اعايىن! بۇگىن ءبىر كەرەمەت جەڭىستى ءارى جەمىستى كۇن بولدى. ءاز-ناۋرىز مەرەكەسىنە وراي، وتەگەن كەنتىندە شاعىن فۋتبولدان ءدۇبىرلى تۋرنير بولىپ ءوتتى.

بۇل جارىستى ۇيىمداستىرعان بەلگىلى ارداگەر سپورت ءجۋرناليسى ءالىم اناپيانوۆ ەدى. ەل ارسىندا سالۋاتتى ءومىر سالتىن دارىپتەپ جۇرگەن ارداقتى اعامىزدىڭ وسىنداي الامان جارىستى ۇلىستىڭ ۇلى مەرەكەسىنە قاتىستى ۇيىمداستىرۋى مەرەكەلىك كوڭىل-كۇيمەن جاراسىن تاپتى.

سونىمەن تۋرنيرگە 5 كوماندا كەلىپ قاتىسقان بولاتىن. اينالىم ەرجەجەسى بويىنشا وربىگەن تۋرنيردە 3 كوماندانى جەڭىپ، ءبىر كوماندامەن تەڭ تۇسكەن ءبىزدىڭ «قالامگەر» اتتى كوماندامىز باس جۇلدەنى جەڭىپ الدى. ەكىنشى ورىندى «وتان اۆتو» كومانداسى يەلەنسە، جۇلدەلى 3 ورىن «وتەگەن كەنت» كومانداسىنىڭ ارداگەر ويىنشىلارىنا بۇيىردى.

ءتۋرنيردىڭ «ۇزدىك ويىنشىسى» ءبىزدىڭ كوماندانىڭ بەلدى ويىنشىسى جاندوس سازانباەۆقا تابىس ەتىلدى. سونىمەن قاتار قورعانىسىمىزدى تاس قامال ۇستاعان قورعاۋشىشىز مۇرات كەنەنوۆكە «ۇزدىك قورعاۋشى» سىيلىعى قۇرمەتپەن بەرىلدى. ال، كوماندامىزدىڭ تاجىربيەلى ويىنشىسى سايفۋتدين شايفۋتدينوۆكە «ارداگەر ويىن ۇيلەستۋشى» نوميناتسياسى بويىنشا سالتاناتپەن تابىس ەتىلدى. سونىمەن تارتىستى وتكەن تۋرنير شەگىنە جەتىپ، باسقا دا ويىنشىلار ءوز ماراپاتتارىن الدى. نەگىزى وسىنداي ارداگەرلەر اراسىندا وتكىزىلىپ تۇراتىن دوپ دودالارىنىڭ ماڭىزى وتە زور دەپ ەسەپتەيمىن. ويتكەنى، سپورت ارقىلى ءبىر-بىرىمەن ارالاسىپ، سىرلاسىپ ءبىر شەر تارقاسۋ ءۇشىن وسىنداي شارالاردىڭ ءجيى وتكىزۋى قاجەت-اق. «دەنى ساۋدىڭ جانى ساۋ» -دەگەن ەلمىز. ءبىر جاعىنان دەنساۋلىق، ەكىنشى جاعى ارالاسىپ قوعامنان شەت قالماۋ بولسا، ءۇشىنشى جاعىنان جاستىق شاقتارىن ەسكە الىپ الاڭدا بار شەبەرلىكتەرىن سالىپ جەڭىس ءۇشىن جانكەشتىلىك تانىتۋ بولىپ تابىلادى. ەندەشە وسىنداي ارداگەرلەر ءۇشىن ۇيىمداسىرىلىپ تۇراتىن جارىستاردىڭ قاتارى كوپ بولسا يگى ەدى دەپ تىلەيمىز.

اقىن ورداباي ۇلى،

الماتى وبلىسى،

وتەگەن كەنتى