SportPress.kz قازاقستان سپورت جاڭالىقتارى
ەلىمىزدىڭ ءبىرىنشى جانە الەمنىڭ ءتورتىنشى راكەتكاسى ەلەنا رىباكينا اقش-تىڭ مايامي شتاتىندا ءوتىپ جاتقان WTA 1000 ءتۋرنيرىنىڭ جارتىلاي فينالىنا شىقتى، دەپ حابارلادى قازاقستان تەننيس فەدەراتسياسى.
قازاقستاننىڭ كوشباسشى تەننيسشىسى شيرەك فينالدا الەمنىڭ 9-راكەتكاسى، گرەكيالىق ماريا ساككاريمەن سىنعا ءتۇستى.
قارسىلاستار وسىعان دەيىن ءوزارا ءۇش رەت كەزدەسىپ، سونىڭ ەكەۋىندە رىباكينا جەڭگەن ەدى.
بۇل جولى ءبىرىنشى پارتيادا ەلەنا رىباكينا 4:2 ەسەبىمەن العا شىققانىمەن، ماريا ساككاري ىزىنشە برەيك جاسادى. دەگەنمەن قازاقستان تەننيسشى تاعى ءبىر برەيكپەن تۇيىندەدى. ەسەپ — 7:5.
ەكىنشى سەتتە كەرىسىنشە ساككاري 3:1 ەسەبىمەن العا شىقتى. دەگەنمەن رىباكينا تارازى باسىن تەڭەستىرە الدى. ەسەپ — 4:4. سودان كەيىن ەسەپ 5:4 بولىپ، قارسىلاسى دوپ بەرگەندە، ەكى بىردەي ماتچبولدى ءمۇلت جىبەردى. تاي-برەيكتە ساككاري ءساتتى وينادى. ول رىباكينانى 7:6 (7:4) ەسەبىمەن جەڭدى.
ءۇشىنشى، شەشۋشى سەتتە ەسەپ 3:3 بولعان كەزدە قازاقستان تەننيسشىسى برەيك جاساي ءبىلدى. سودان كەيىن ءوزى دوپ بەرگەندە، بەسىنشى ماتچبولىن پايدالاندى. ەسەپ — 6:4.
ەندى رىباكينا فينالعا شىعۋ ءۇشىن الەمنىڭ 32-راكەتكاسى، بەلارۋس وكىلى ۆيكتوريا ازارەنكومەن كەزدەسەدى. ول شيرەك فينالدا يۋليا پۋتينتسەۆادان باسىم ءتۇستى.
