مينيستر بوكس فەدەراتسياسىنىڭ باسشىسىنا تاپسىرما بەردى

تۋريزم جانە سپورت ءمينيسترى ەرمەك مارجىقپاەۆ قازاقستان بوكس فەدەراتسياسىنىڭ پرەزيدەنتى شاحمۇرات مۇتالىپپەن كەزدەسىپ، يتاليانىڭ بۋستو-ارسيتسيو قالاسىندا وتكەن الەمدىك ليتسەنزيالىق ءتۋرنيردىڭ قورىتىندىسى مەن الداعى ۋاقىتتا بولاتىن جارىستاردى، وڭىرلەردە بوكستى دامىتۋدىڭ جاڭا باعىتتارىن تالقىلادى، دەپ حابارلادى تۋريزم جانە سپورت مينيسترلىگى.

وزدەرىڭىز بىلەسىزدەر، يتالياداعى تۋرنيردە بوكستان ەرلەر قۇراماسى ءتاۋىر ناتيجە كورسەتىپ، بەس سالماق دارەجەسى بويىنشا وليمپيادا جولداماسىن جەڭىپ الدى. تەك ءبىر عانا سالماقتا ليتسەنزيا بۇيىرمادى. ال قىزدار قۇراماسى ناشار بوكستاستى. بۇل تۋرنيردە ءبىزدىڭ قىزدارعا فۋنكتسيونالدىق جانە فيزيكالىق دايىندىق جەتىسپەيتىنى انىق بايقالدى. تاعى ءبىر ماسەلە – قوسالقى قۇرامنىڭ ازدىعى. لايىقتى ءىزباسارلار جوق. سوندىقتان بوكس فەدەراتسياسىنىڭ پرەزيدەنتى ۇلكەن ساراپتاما جۇرگىزىپ، قاتەلىكتەرمەن جۇمىس ىستەۋى قاجەت. تايلاندتاعى تۋرنيرگە باراتىن بوكسشىلاردى ىرىكتەۋ قاتاڭ تۇردە وتەدى، — دەدى ول.

سونداي-اق كەزدەسۋدە مينيستر فەدەراتسيا باسشىسىنا ۇلتتىق قۇراماعا ساپالى ءىزباسارلاردى دايىنداۋ، وڭىرلەردە بوكس سپورتىن دامىتۋدى تاپسىردى.

ەرمەك مارجىقپاەۆتىڭ ايتۋىنشا، بىلتىرعى سپارتاكيادا قاي وبلىستاردا بوكستىڭ ناشار ەكەنىن كورسەتىپ بەردى. سوندىقتان ول ناقتى وڭىرلەر بويىنشا جۇمىس ىستەۋ كەرەتىگىن ايتتى.