وليمپيادا چەمپيونى 250 مىڭ دوللار الادى

تۋريزم جانە سپورت مينيسترلىگى مەملەكەت تاراپىنان بيىلعى جازعى وليمپيالىق ويىنداردا چەمپيون اتانعان جانە جۇلدە العان سپورتشىلار مەن ولاردىڭ جاتتىقتىرۋشىلارىنا بەرىلەتىن سىياقىنى جاريالادى.

وليمپيادانىڭ چەمپيونى مەن جۇلدەگەرىنە جانە ولاردىڭ جاتتىقتىرۋشىلارىنا تاعايىندالعان سىياقى بىلتىر مادەنيەت جانە سپورت ءمينيسترىنىڭ بۇيرىعىنا سايكەس، تابىس ەتىلەدى. ياعني وليمپيادا چەمپيونى مەن ونىڭ جاتتىقتىرۋشىسى 250 مىڭ اقش دوللارىن، كۇمىس جۇلدەگەر 150 مىڭ دوللار ، قولا مەداليست 75 مىڭ دوللار السا، تورتىنگى ورىن العان سپورتشىعا 30 مىڭ دوللار، بەسىنشى ورىندى يەلەنگەن وتانداسىمىزعا 10 مىڭ دوللار، التىنشى ورىننان كورىنگەن ساڭلاققا 5 مىڭ اقش دوللارى كولەمىندە سىياقى تاپسىرىلادى.

سونىمەن بىرگە كۇمىس مەداليستىڭ جاتتىقتىرۋشىسىنا دا 150 مىڭ دوللار بەرىلسە، قولا جۇلدەگەردىڭ باپكەرى دە سپورتشى سياقتى 75 مىڭ دوللار الادى. ءتورتىنشى، بەسىنشى جانە التىنشى ورىن العان سپورتشىنىڭ جاتتىقتىرۋشىلارى دا تيىسىنشە 30 مىڭ، 15 مىڭ، 5 مىڭ دوللارمەن ماراپاتتالادى.

بۇعان دەيىن حابارلانعانداي، بوكس فەدەراتسياسىنىڭ پرەزيدەنتى شاحمۇرات ءمۇتالىپ رامازان ايىنىڭ قۇرمەتىنە بەرىلگەن اۋىزاشاردا وليمپيادادا چەمپيونى اتانعان بوكسشى مەن جۇلدەگەرگە جانە ولاردىڭ جاتتىقتىرۋشىلارىنا بەرىلەتىن سىياقىنىڭ كولەمىن جاريالاعان بولاتىن. فەدەراتسيا پرەزيدەنتى وليمپيادا چەمپيونىنا 220 مىڭ، كۇمىس جۇلدەگەرگە 120 مىڭ، قولا مەداليسكە 70 مىڭ، 4-ورىن العان بوكسشىعا 30 مىڭ جانە 5-ورىننان كورىنگەن بوكسشىعا 10 مىڭ دوللار كولەمىندە سىياقى بەرىلەتىنىن، باس جاتتىقتىرۋشى مەن جاتتىقتىرۋشىلار القاسى ورىن العان بوكسشى سىياقىسىنىڭ 30 پايىزىنا پارا-پار قارجىلاي سىياقى الاتىنىن ايتتى.

وليمپيادا مەدالدارى تۋرالى ايتا كەتسەك، بيىلعى جۇلدەنىڭ باسقالاردان باستى ايىرماشىلىعى – مەدال ورتاسىندا ەيفەل مۇناراسى بەينەلەنگەن.

وسى ءبىر التىن، كۇمىس جانە قولا جۇلدەنىڭ ەڭ باستى قۇندى بولىگى – ەيفەل مۇناراسىمەن ۇشتاستىرۋ ءۇشىن ۇلكەن جۇمىس اتقارىلدى، — دەلىنگەن حالىقارالىق وليمپيادا كوميتەتىنىڭ سايتىندا.

جالپى ەسەبى 5084 مەدال شىعارىلدى. ونىڭ ءار قايسىسىندا 18 گرامم ەيفەل مۇناراسى بار.

پاريجدەگى جازعى وليمپيالىق ويىندار 26 شىلدە مەن 11 تامىز ارالىعىندا وتەدى.