بوكستان جاستار جانە جاسوسپىرىمدەر قۇرامالارىنا جاڭا جاتتىقتىرۋشىلار كەلدى (ۆيدەو)

بوكستان قازاقستان جاستار قۇراما كومانداسىنىڭ جاتتىقتىرۋشىلار قۇرامىندا وزگەرىس بولدى.  

بوكس فەدەراتسياسىنىڭ حابارلاۋىنشا، قازاقستان جاستار قۇراماسىنىڭ اعا جاتتىقتىرۋشىسى قىزمەتىنە قايرات ءساتجانوۆ تاعايىندالدى.

ول ءادىل باسىعاراەۆتى الماستىردى.

قايرات ءساتجانوۆ ەڭبەك جولىندا جاسوسپىرىمدەر كومانداسىنان باسقا، ەرەسەكتەر اراسىنداعى ۇلتتىق قۇراما كوماندانى دا جاتتىقتارعان. ءساتجانوۆتىڭ جەتەكشىلىگىمەن بوكسشىلار سەربيادا وتكەن الەم چەمپيوناتىندا 2 التىن، 2 كۇمىس، 1 قولا مەدال جەڭىپ العان بولاتىن.

قايرات تۇرسىنقان ۇلى — قازاقستاننىڭ ەڭبەك سىڭىرگەن جاتتىقتىرۋشىسى. 2011-2019 جىلدار ارالىعىندا قازاقستان جاسوسپىرىمدەر قۇراماسىن جاتتىقتىرعان. 2013 جىلعى الەم چەمپيوناتىندا كوماندا 2 التىن، 1 كۇمىس، 5 قولا مەدال ەنشىلەسە، 2015 جىلعى دۇنيەجۇزىلىك دودادا 1 التىن، 1 كۇمىس، 3 قولا جۇلدەنى جەڭىپ العان.

2019-2021 جىلدارى جاستار قۇراماسىنىڭ اعا جاتتىقتىرۋشىسى بولدى. 2021 جىلعى الەم چەمپيوناتىندا 2 التىن، 2 كۇمىس جانە 1 قولا مەدال يەلەندى. ال 2021-2022 جىلدار ارالىعىندا ۇلتتىق قۇرامامىزدىڭ باس باپكەرى بولىپ، 2021 جىلعى دۇنيەجۇزىلىك دودادا 2 التىن، 2 كۇمىس، 1 قولا مەدالمەن جالپىكوماندالىق ەسەپتە ەكىنشى ورىندى الىپ بەردى.

ايەلدەر قۇراماسىندا دا  جاتتىقتىرۋشىلار اۋىستى. قىزدار اراسىنداعى جاستار قۇراماسىنا جانگەلدى احمەتوۆ اعا باپكەر بولىپ تاعايىندالدى.

بوكستان ايەلدەر اراسىنداعى قازاقستان جاستار قۇراماسىندا اعا جاتتىقتىرۋشى الماستى. بۇل قىزمەتكە احمەتوۆ جانگەلدى ءالىمجان ۇلى تاعايىندالدى.

جانگەلدى ءالىمجان ۇلى — قازاقستاننىڭ ەڭبەك سىڭىرگەن جاتتىقتىرۋشىسى. جاتتىقتىرۋشىلىق تاجىريبەسى 25 جىلدى قۇرايدى. بۇگىنگە دەيىن جەتىسۋ وبلىسىنىڭ ايەلدەر اراسىنداعى اعا جاتتىقتىرۋشىسى قىزمەتىن اتقاردى.

بۇل قىزمەتتە جانگەلدى احمەتوۆ ايەلدەر قۇراماسىنىڭ باس باپكەرلىگىنە تاعايىندالعان ەلدوس ءسايداليندى الماستىردى.

سونىمەن بىرگە بوكستان قازاقستان ءجاسوسپىرىم كومانداسىنا ماقسات وسپانوۆ، ءجاسوسپىرىم قىزدار كومانداسىنا ايبەك ءابىلدا جەتەكشىلىك ەتەدى.

قازاقستان بوكس فەدەراتسياسى تورەشىلەر القاسىنىڭ توراعاسى دا الماستى.

قايرات جۇمانقۇلوۆتىڭ ورنىنا دىنمۇحامەد ابايحان تاعايىندالدى.

دىنمۇحامەد ابايحان ۇلى 2012 جىلدان باستاپ بوكستان تورەشىلىك قىزمەت اتقارادى. 2023 جىلدان باستاپ حالىقارالىق دارەجەدەگى ءىۆا 2* تورەشىسى.

داستان كەنجالين،

استانا

 

View this post on Instagram

 

A post shared by Tukeshov Zhalgas (@tukeshov_official)