SportPress.kz قازاقستان سپورت جاڭالىقتارى
تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ «سپورتتى دامىتۋ ديرەكتسياسى» پاريجدەگى جازعى وليمپياداعا ارنالعان قازاقستان ۇلتتىق قۇراماسىنىڭ كيىم فورماسى مەن وعان قوسىمشا كەرەك-جاراق جابدىقتاردىڭ ديزاين تۇجىرىمداماسىن ازىرلەۋگە ارنالعان كونكۋرس قايتادان جاريالانعانىن حابارلادى.
وسىعان دەيىنگى اقپان ايىندا باستالعان ۇلتتىق قۇرامانىڭ كيىم فورماسى مەن وعان قوسىمشا كەرەك-جاراق جابدىقتاردىڭ ديزاين تۇجىرىمداماسىن ازىرلەۋگە ارنالعان كونكۋرستا قاتىسۋشىلاردىڭ ەشبىر ەسكيزى كوميسسيا مۇشەلەرىنىڭ كوڭىلىنەن شىقپاۋىنا بايلانىستى كوميسسيا العاشقى كونكۋرستى وتپەدى دەپ شەشىم شىعاردى.
كيىمدەر تۋ ۇستاۋشىلار، سالتاناتتى ءراسىم مەن جاتتىعۋعا ارنالعان جۇپتان تۇرادى. كونكۋرس كەزىندە كەلىپ تۇسكەن جۇمىستاردى ارنايى كوميسسيا قۇرامى قاراپ، ورتاق شەشىم قابىلدايدى. جۇمىس توبىنىڭ قاتارىنا تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتى،ۇلتتىق وليمپيادا كوميتەتى، قازاقستان سپورتشىلارى وداعىنىڭ وكىلدەرى، داڭقتى سپورتشىلارىمىز بەن باق قىزمەتكەرلەرى كىرەدى. بۇل قاتاردا ەلدوس سمەتوۆ، سەرىك ساپيەۆ، ازامات داۋلەتبەكوۆ، ءجاميلا باقبەرگەنوۆا، ولگا رىپاكوۆا، ءابيبا ابۋجاقىنوۆا، اننا اليابەۆا، نۇربەك ورالباي، نۇرسۇلتان تۇرسىنوۆتى اتاپ وتۋگە بولادى. كوميسسيا توراعاسى – سپورتتى دامىتۋ ديرەكتسياسىنىڭ ديرەكتورى ەرلان ەستەك.
كونكۋرس ەكى كەزەڭگە سوزىلادى. ءاربىر كەزەڭ جەڭىمپازى ەرەجە شارتتارىنا سايكەس كوميسسيا وتىرىسىندا انىقتالادى.
ءبىرىنشى كەزەڭدە كوميسسيا كونكۋرسقا قاتىسۋشىلار وتىنىشتەرىن، ماتەريالدارىن قابىلداپ، قارايدى. ءبىرىنشى كەزەڭ 10 ساۋىردە ساعات 20:00-دەن باستالىپ، 15 ساۋىردە ساعات 18:30 دەيىن بولادى.
ەكىنشى كەزەڭدە كونكۋرس جەڭىمپازدارى انىقتالىپ، جاريالانادى. بۇل كەزەڭ 16-17 ءساۋىر ارالىعىندا بولادى.
كونكۋرسقا قاتىسۋشىلارعا ءتۇسىندىرۋ جۇمىسىنا جانە جالپى كونكۋرس وتكىزۋگە تسم سپورت جانە دەنە شىنىقتىرۋ كوميتەتى سپورتتى دامىتۋ ديرەكتسياسىنىڭ مەملەكەتتىك ساتىپ الۋ ءبولىمىنىڭ باستىعى ەرجان اسقاروۆ جاۋاپتى.
كونكۋرستىڭ ەرەجەسىن، بۇيرىق پەن كوميسسيا قۇرامى مەن ۇوك كومانداسىنىڭ كيىم فورماسىنا قاتىستى بىرىڭعاي نۇسقاۋلىعى مىنا جەردەن كورۋگە بولادى.
