فۋتبولدان قازاقستان كۋبوگى:  «اتىراۋ» لەگيونەرسىز ويناۋ المايتىنىن كورسەتتى

13 ساۋىردە فۋتبولدان قازاقستان كۋبوگىنىڭ 1/8 فينالدىڭ ويىندارى باستالىپ، ەكى ەكى كۇنگە سوزىلدى.

تۋرنيردە ءبىرىنشى ليگادان ءۇش، پرەمەر ليگادان ون ءۇش كوماندا قاتىسىپ، باق سىنادى. وسى ماۋسىمداعى كۋبوك ويىندارىنىڭ ءبىر ەرەكشەلىگى، قارىمتا ماتچ بولمايدى.

ايتا كەتۋ كەرەك، ەلىمىزدە بولىپ جاتقان توتەنشە جاعدايعا بايلانىستى بارلىق كلۋبتار «كۇشىمىز بىرلىكتە» دەگەن جازۋى بار جەيدەمەن الاڭعا شىقتى. Sportpress.kz سايتى  قازاقستان كۋبوگى ءۇشىن ويىندارعا شولۋ جاساپ شىقتى.

«اتىراۋ» — «SD Family» 6:0

كۋبوكتىڭ العاشقى ماتچى اتىراۋدا بولدى. «تويدىڭ بولعانىنان بولادىسى قىزىق» دەمەكشى، استانالىق ۇجىم ويىن الدىندا «اتىراۋ» كومانداسىنا لەگيونەرلەرسىز ويناۋدى ۇسىندى. الايدا، جەرگىلىكتى كوماندا بۇل ۇسىنىسپەن كەلىسپەدى.

ويىن باستالا سالىسىمەن «مۇنايشىلار» قارسىلاستارىن قىسپاققا الا باستادى. ويىن تىزبەگىن وزدەرىنە العان اتىراۋلىقتار 29-مينۋتتا ەسەپ اشتى. گولدىڭ اۆتورى -برازيليالىق ماتەۋس باربوسا. ارادا ءتورت مينۋت وتە سالىسىمەن تاجىكستاندىق فاتحۋللو وليمزودا دەبيۋتتىق گولىن سوعىپ، ەسەپتى ەسەلەدى.

العاشقى تايمنىڭ نەگىزگى ۋاقىتىنا ءبىر مينۋت قوسىلعان بولاتىن. وسى ۋاقىتتا «اتىراۋدىڭ» پورتۋگالدىق قورعاۋشىسى پەدرۋ ەۋجەنيۋ ەسەپتى 3:0 -گە جەتكىزدى.

ەكىنشى تايمدا جەڭىسكە جەتەتىنىنە سەنىمدى بولعان ۆيتالي جۋكوۆسكي نەگىزگى قاقپاشى ەگور حاتكەەۆيچتىڭ ورنىنا نۇراسىل توحتاروۆتى شىعارۋدى ءجون كوردى. ماتچتىڭ 63-مينۋتىندا «اتىراۋ» ويىنشىلارى ەرەجە بۇزىپ، قاقپاعا پەنالتي بەلگەلەندى. ون ءبىر مەترلىك ايىپ دوپتى جارتىلاي قورعاۋشى سۇلتان ساگناەۆ ورىنداپ، قاقپا كىلتىن تابا المادى. وسىلايشا، نۇراسىل توحتاروۆ دەبيۋتتىك ماتچىندا پەنالتيدى قايتارىپ، كوزگە ءتۇسىپ وتىر. ال «اتىراۋدىڭ» 64-مينۋتتاعى شابۋىلىن ماتەۋس باربوزا گولمەن اياقتاپ، دۋبل جاسادى.

ماتچتىڭ 83-مينۋتىندا «اتىراۋ» قورعاۋشىسى نيكيتا ستەپانوۆ «SD Family» قاقپاشىسىنان ايلاسىن اسىرىپ، ەسەپتى 6:0 جەتكىزدى. سودان سوڭ 87-مينۋتتا استانالىقتاردىڭ قاقپاسىنا پەنالتي بىلگىلەنىپ، پەدرۋ ەۋجەنيۋ ونى ءساتتى ورىنداپ، دۋبل اۆتورى اتاندى.

ءبىرىنشى ليگا مەن پرەمەر ليگا كوماندالارى اراسىنداعى ايقاس وسىلايشا ءىرى ەسەپپەن اياقتالدى.

«قايسار» — «توبىل» 0:3

«قايسار» پرەمەر ليگاداعى ءساتسىز ويىندارىن كۋبوك ماتچتارىندا دا كورسەتۋدە. ويىننىڭ 27-مينۋتىندا يسلام چەسنوكوۆتىڭ اسىرعان پاسىن احمەد ەل-مەسساۋدي باسپەن قاقپاعا ءدال باعىتتىپ، ويىن ەسەبىن اشتى. ويىننىڭ نەگىزگى ۋاقىتىنا ءۇش مينۋت قوسىلعان ساتتە قوستانايلىقتار دورەكى ويىن كورسەتىپ، قاقپاعا پەنالتي بەلگىلەندى. ستاس پوكاتيلوۆ دميتري ءبوروديننىڭ تەپكەن دوبىنىڭ باعىتىن ءدال تاۋىپ، قاقپانى گولدان امان الىپ قالدى.

ەكىنشى تايمنىڭ 60-مينۋتىندا ەركىن تاپالوۆ ارىپتەسى رادوسلاۆ تسونەۆكە گولدىق پاس اسىرىپ، ەسەپتى ەسەلەدى. 84-مينۋتتا ەنەن مەن ەل-مەسساۋديدىڭ دۋەتىنەن گول سوعىلدى. وسىلايشا، احمەد ەل-مەسساۋدي ماتچتاعى ەكىنشى گولىن سالىپ، دۋبل اۆتورى اتاندى. سونىمەن «قايساردىڭ» كۋبوكتاعى جورىعى العاشقى ويىننان-اق اياقتالدى.

«جەڭىس» — «استانا» 0:1

ەلوردالىق كوماندالار وسى ماۋسىمدا ەكىنشى رەت كەزدەسىپ وتىر. ويىن الدىندا «استانانىڭ» بۇنداي تاجىريبەلى ويىنشىلارىمەن، بۇدان دا ءىرى ەسەپپەن جەڭەدى دەگەن بولجامدار ايتىلعان ەدى.

ويىن باستالا سالىسىمەن 5-مينۋتتا شابۋىلشى رامازان كارىموۆ گول سوعىپ، كومانداسىن العا سۇيرەدى. رامازان وسىلايشا، «استانا» ساپىنداعى رەسمي ماتچتا العاشقى گولىن سالىپ وتىر. «جەڭىس» بولسا، جاۋاپسىز گول وتكىزىپ، شيرەك فينالعا شىعا المادى.

«قايرات» — «تۇران» 3:0

الماتىنىڭ ورتالىق ستاديونىندا «قايرات» تۇركىستاندىق ۇجىمدى قابىلدادى. پرەمەر ليگاداعى ماتچتا سىرت الاڭدا «قايرات» «تۇراندى» جەڭە الماعان بولاتىن. بۇل ويىندا ءبارى دە باسقاشا بولدى.

ويىننىڭ 29-مينۋتىندا پاۋلونىڭ پاسىن ءساتتى پايدالانعان ەلدەر سانتانا «قايرات» ساپىنداعى العاشقى گولىن سوقتى. العاشقى تايمنىڭ اياقتالار تۇسىندا زاريانىڭ ورىنداعان ايىپ دوبىن لۋكا گادراني باسپەن قاقپاعا باعىتتاپ، ەسەپ ايىرماسىن ۇزارتتى. گادراني مەن زاريا ناعىز گرۋزيالىق فۋتبولدى كورسەتتى.

ەكىنشى تايمنىڭ 88-مينۋتىندا ەلدەر سانتانانىڭ ورنىنا ەركەبۇلان سەيداحمەت شىقتى. 90+4-مينۋتتا ويىن ەرەجەسى بۇزىلىپ، «تۇران» قاقپاسىنا پەنالتي بەلگىلەندى. پەنالتيدى الاڭعا تىڭنان قوسىلعان ەركەبۇلان سەيداحمەت ورىنداپ، ەسەپتى 3:0 جەتكىزدى. وسىلايشا، «قايرات» ەش كۇمانسىز جەڭىسكە جەتتى.

«وڭتۇستىك اكداەميا» — «قىزىلجار»  1:2 

ويىن شىمكەنتتەگى «بيىك» ستاديونىندا بولدى. الاڭ يەلەرى 27-مينۋتتا عالامات گول سوقتى. گولدىڭ اۆتورى — 20 جاستاعى جارتىلاي قورعاۋشى دياس دونباي.

ەكىنشى تايمدا «قىزىلجار» جەڭىلىپ جاتقان سوڭ، الاڭعا نەگىزگى قۇرامداعى ويىنشىلارىن شىعارا باستادى. سايكەسىنشە ءۇش مينۋتتا ەكى گول سوعىپ، ەسەپتى 1:2-گە جەتكىزدى.

العاشقى گولدى مادي حاسەين سالسا، ەكىنشى دوپتى تورعا رۋبەن بريجدۋ توعىتتى. ويىن ەرەجەسىن كوپ بۇزۋىنا بايلانىستى 80-مينۋتتا «وڭتۇستىك اكادەميا» ويىنشىسى جاۆلانبەك بابانازاروۆ قىزىل قاعازبەن جازالانىپ، الاڭنان قۋىلدى. پەتروپاۆلدىق ۇجىم وسىلايشا جەڭىسپەن ورالدى.

«تاراز» — «ورداباسى» 0:2

«تاراز» ءوز الاڭىندا «ورداباسىنى»  قابىلدادى. ويىن وتە تارتىستى بولدى. ماتچتىڭ 36-مينۋتىندا لوپەس رەيجينالدو گول سوعىپ، شىمكەنتتىكتەردى العا سۇيرەدى. وسى گولدان كەيىن تارازدىقتار ابدىراپ ەكىنشى گولدى بىردەن 37-مينۋتتا جىبەرىپ الدى. قاقپاشىنىڭ قاتەلىگىن ءساتتى پايدالانعان ەركەبۇلان تۇڭعىشباەۆ وسى ماۋسىمداعى العاشقى گولىن سوقتى.

ەكىنشى تايمدا كوماندالار ءبىر بىرىنە شابۋىلداۋمەن بولدى. الايدا گول كورە المادىق. الەكساندر سەدنەۆ شاكىرتتەرى وسىلايشا سەنىمدى تۇردە جەڭىسكە جەتىپ، كەلەسى كەزەڭگە ءوتتى.

«اقتوبە» — «جەتىسۋ» 1:0

«اقتوبە» قوناقتاردى ءبىر دوپ ەسەپ ايىرماسىمەن جەڭىپ كەتتى. «اق-قىزىلدار» العاشقى 20 مينۋت بويى توقتاماي، شابۋىل جاساپ قارسىلاسقا مۇرشا بەرمەدى. 44-مينۋتتا قورعاۋشى دميتري بەسسمەرتنىي «اقتوبە» ساپىنداعى العاشقى گولىن سوقتى.

ال ەكىنشى تايمدا «اقتوبەلىكتەردىڭ» ادەتتەگىدەي ويىنى جۇرمەي، كوپ قاتەلىك جىبەردى. «جەتىسۋ»  ءوز مۇمكىندىكتەرىن پايدالانا المادى.

ماتچتىڭ 85-مينۋتىندا  تالدىقورعاندىق شابۋىلشى انتون شرامچەنكو قىزىل قاعاز الىپ، ويىننان شەتتەتىلدى. بۇل ويىندا قايرات نۇرداۋلەتوۆتىڭ جوسپارى ىسكە اسپادى. ال «اقتوبە» 1/4 فينالدا سىرت الاڭدا «ورداباسىمەن» وينايدى.

«ەلىماي» — «شاحتەر» 2:1

«ەلىماي» كەرەكۋدە «شاحتەردى» قابىلدادى. العاشقى تايمدا قاۋىپتى ساتتەردى دە، گول دا كورە المادىق. الايدا ەكىنشى تايمنىڭ 50-مينۋتىندا رودجەريو شينا ەسەپ اشىپ، «ەلىماي» العا شىقتى. كوپ ۇزاماي 73-مينۋتتا «شاحتەر» ويىنشىسى دميتري باچەك ەسەپتى تەڭەستىردى. 87-مينۋتتا سەمەيلىك يۆان سۆيريدوۆتىڭ سوققان گولى كومانداسىنا جەڭىس اكەلدى. وسىلايشا اندرەي كارپوۆيچ شاكىرتتەرى كەلەسى كەزەڭگە ءوتتى.

1/4 فينالدا وينايتىن جۇپتار ءتىزىمى:

«توبىل» — «استانا»

«اتىراۋ» — «قايرات»

«ورداباسى» — «اقتوبە»

«ەلىماي» — «قىزىلجار»

 

اينات قابيدۋللاەۆ،

استانا