SportPress.kz Qazaqstan sport jańalyqtary
13 sáýirde fýtboldan Qazaqstan kýbogynyń 1/8 fınaldyń oıyndary bastalyp, eki eki kúnge sozyldy.
Týrnırde Birinshi lıgadan úsh, Premer lıgadan on úsh komanda qatysyp, baq synady. Osy maýsymdaǵy Kýbok oıyndarynyń bir ereksheligi, qarymta match bolmaıdy.
Aıta ketý kerek, elimizde bolyp jatqan tótenshe jaǵdaıǵa baılanysty barlyq klýbtar «Kúshimiz birlikte» degen jazýy bar jeıdemen alańǵa shyqty. Sportpress.kz saıty Qazaqstan kýbogy úshin oıyndarǵa sholý jasap shyqty.
«Atyraý» — «SD Family» 6:0
Kýboktyń alǵashqy matchy Atyraýda boldy. «Toıdyń bolǵanynan boladysy qyzyq» demekshi, astanalyq ujym oıyn aldynda «Atyraý» komandasyna legıonerlersiz oınaýdy usyndy. Alaıda, jergilikti komanda bul usynyspen kelispedi.
Oıyn bastala salysymen «munaıshylar» qarsylastaryn qyspaqqa ala bastady. Oıyn tizbegin ózderine alǵan atyraýlyqtar 29-mınýtta esep ashty. Goldyń avtory -brazılııalyq Mateýs Barbosa. Arada tórt mınýt óte salysymen tájikstandyq Fathýllo Olımzoda debıýttyq golyn soǵyp, esepti eseledi.
Alǵashqy taımnyń negizgi ýaqytyna bir mınýt qosylǵan bolatyn. Osy ýaqytta «Atyraýdyń» portýgaldyq qorǵaýshysy Pedrý Eýjenıý esepti 3:0 -ge jetkizdi.
Ekinshi taımda jeńiske jetetinine senimdi bolǵan Vıtalıı Jýkovskıı negizgi qaqpashy Egor Hatkeevıchtiń ornyna Nurasyl Tohtarovty shyǵarýdy jón kórdi. Matchtyń 63-mınýtynda «Atyraý» oıynshylary ereje buzyp, qaqpaǵa penaltı belgelendi. On bir metrlik aıyp dopty jartylaı qorǵaýshy Sultan Sagnaev oryndap, qaqpa kiltin taba almady. Osylaısha, Nurasyl Tohtarov debıýttik matchynda penaltıdi qaıtaryp, kózge túsip otyr. Al «Atyraýdyń» 64-mınýttaǵy shabýylyn Mateýs Barboza golmen aıaqtap, dýbl jasady.
Matchtyń 83-mınýtynda «Atyraý» qorǵaýshysy Nıkıta Stepanov «SD Family» qaqpashysynan aılasyn asyryp, esepti 6:0 jetkizdi. Sodan soń 87-mınýtta astanalyqtardyń qaqpasyna penaltı bilgilenip, Pedrý Eýjenıý ony sátti oryndap, dýbl avtory atandy.
Birinshi lıga men Premer lıga komandalary arasyndaǵy aıqas osylaısha iri eseppen aıaqtaldy.
«Qaısar» — «Tobyl» 0:3
«Qaısar» Premer lıgadaǵy sátsiz oıyndaryn kýbok matchtarynda da kórsetýde. Oıynnyń 27-mınýtynda Islam Chesnokovtyń asyrǵan pasyn Ahmed el-Messaýdı baspen qaqpaǵa dál baǵyttyp, oıyn esebin ashty. Oıynnyń negizgi ýaqytyna úsh mınýt qosylǵan sátte qostanaılyqtar dóreki oıyn kórsetip, qaqpaǵa penaltı belgilendi. Stas Pokatılov Dmıtrıı Borodınniń tepken dobynyń baǵytyn dál taýyp, qaqpany goldan aman alyp qaldy.
Ekinshi taımnyń 60-mınýtynda Erkin Tapalov áriptesi Radoslav onevke goldyq pas asyryp, esepti eseledi. 84-mınýtta Enen men El-Messaýdıdiń dýetinen gol soǵyldy. Osylaısha, Ahmed el-Messaýdı matchtaǵy ekinshi golyn salyp, dýbl avtory atandy. Sonymen «Qaısardyń» kýboktaǵy joryǵy alǵashqy oıynnan-aq aıaqtaldy.
«Jeńis» — «Astana» 0:1
Elordalyq komandalar osy maýsymda ekinshi ret kezdesip otyr. Oıyn aldynda «Astananyń» bundaı tájirıbeli oıynshylarymen, budan da iri eseppen jeńedi degen boljamdar aıtylǵan edi.
Oıyn bastala salysymen 5-mınýtta shabýylshy Ramazan Kárimov gol soǵyp, komandasyn alǵa súıredi. Ramazan osylaısha, «Astana» sapyndaǵy resmı matchta alǵashqy golyn salyp otyr. «Jeńis» bolsa, jaýapsyz gol ótkizip, shırek fınalǵa shyǵa almady.
«Qaırat» — «Turan» 3:0
Almatynyń ortalyq stadıonynda «Qaırat» túrkistandyq ujymdy qabyldady. Premer lıgadaǵy matchta syrt alańda «Qaırat» «Turandy» jeńe almaǵan bolatyn. Bul oıynda bári de basqasha boldy.
Oıynnyń 29-mınýtynda Paýlonyń pasyn sátti paıdalanǵan Elder Santana «Qaırat» sapyndaǵy alǵashqy golyn soqty. Alǵashqy taımnyń aıaqtalar tusynda Zarıanyń oryndaǵan aıyp dobyn Lýka Gadranı baspen qaqpaǵa baǵyttap, esep aıyrmasyn uzartty. Gadranı men Zarııa naǵyz grýzııalyq fýtboldy kórsetti.
Ekinshi taımnyń 88-mınýtynda Elder Santananyń ornyna Erkebulan Seıdahmet shyqty. 90+4-mınýtta oıyn erejesi buzylyp, «Turan» qaqpasyna penaltı belgilendi. Penaltıdi alańǵa tyńnan qosylǵan Erkebulan Seıdahmet oryndap, esepti 3:0 jetkizdi. Osylaısha, «Qaırat» esh kúmánsiz jeńiske jetti.
«Ońtústik akdaemııa» — «Qyzyljar» 1:2
Oıyn Shymkenttegi «Bıik» stadıonynda boldy. Alań ıeleri 27-mınýtta ǵalamat gol soqty. Goldyń avtory — 20 jastaǵy jartylaı qorǵaýshy Dıas Donbaı.
Ekinshi taımda «Qyzyljar» jeńilip jatqan soń, alańǵa negizgi quramdaǵy oıynshylaryn shyǵara bastady. Sáıkesinshe úsh mınýtta eki gol soǵyp, esepti 1:2-ge jetkizdi.
Alǵashqy goldy Madı Haseın salsa, ekinshi dopty torǵa Rýben Brıjdý toǵytty. Oıyn erejesin kóp buzýyna baılanysty 80-mınýtta «Ońtústik akademııa» oıynshysy Javlanbek Babanazarov qyzyl qaǵazben jazalanyp, alańnan qýyldy. Petropavldyq ujym osylaısha jeńispen oraldy.
«Taraz» — «Ordabasy» 0:2
«Taraz» óz alańynda «Ordabasyny» qabyldady. Oıyn óte tartysty boldy. Matchtyń 36-mınýtynda Lopes Reıjınaldo gol soǵyp, shymkenttikterdi alǵa súıredi. Osy goldan keıin tarazdyqtar abdyrap ekinshi goldy birden 37-mınýtta jiberip aldy. Qaqpashynyń qateligin sátti paıdalanǵan Erkebulan Tuńǵyshbaev osy maýsymdaǵy alǵashqy golyn soqty.
Ekinshi taımda komandalar bir birine shabýyldaýmen boldy. Alaıda gol kóre almadyq. Aleksandr Sednev shákirtteri osylaısha senimdi túrde jeńiske jetip, kelesi kezeńge ótti.
«Aqtóbe» — «Jetisý» 1:0
«Aqtóbe» qonaqtardy bir dop esep aıyrmasymen jeńip ketti. «Aq-qyzyldar» alǵashqy 20 mınýt boıy toqtamaı, shabýyl jasap qarsylasqa mursha bermedi. 44-mınýtta qorǵaýshy Dmıtrıı Bessmertnyı «Aqtóbe» sapyndaǵy alǵashqy golyn soqty.
Al ekinshi taımda «aqtóbelikterdiń» ádettegideı oıyny júrmeı, kóp qatelik jiberdi. «Jetisý» óz múmkindikterin paıdalana almady.
Matchtyń 85-mınýtynda taldyqorǵandyq shabýylshy Anton Shramchenko qyzyl qaǵaz alyp, oıynnan shettetildi. Bul oıynda Qaırat Nurdaýletovtiń jospary iske aspady. Al «Aqtóbe» 1/4 fınalda syrt alańda «Ordabasymen» oınaıdy.
«Elimaı» — «Shahter» 2:1
«Elimaı» Kerekýde «Shahterdi» qabyldady. Alǵashqy taımda qaýipti sátterdi de, gol da kóre almadyq. Alaıda ekinshi taımnyń 50-mınýtynda Rodjerıo Shına esep ashyp, «Elimaı» alǵa shyqty. Kóp uzamaı 73-mınýtta «Shahter» oıynshysy Dmıtrıı Bachek esepti teńestirdi. 87-mınýtta semeılik Ivan Svırıdovtyń soqqan goly komandasyna jeńis ákeldi. Osylaısha Andreı Karpovıch shákirtteri kelesi kezeńge ótti.
1/4 fınalda oınaıtyn juptar tizimi:
«Tobyl» — «Astana»
«Atyraý» — «Qaırat»
«Ordabasy» — «Aqtóbe»
«Elimaı» — «Qyzyljar»
Aınat QABIDÝLLAEV,
ASTANA
