Kúresten ACh: Ibragım Magomadov — qola medalıst!

Grek-rım kúresinen Qazaqstan komandasynyń múshesi Ibragım Magomadov Qyrǵyzstanda ótip jatqan Azııa chempıonatynyń qola júldegeri atandy, dep habarlady Olympic.kz. 

77 keli salmaq dárejesinde synǵa túsken Ibragım Magomadov qola medal úshin kúreste Iran balýanynan 4:3 esebimen basym tústi.

Magomadov týrnırde álem chempıony, qyrǵyzstandyq Aqjol Mahmudovqa ese jibergen bolatyn.

Bul — 33 jastaǵy sportshynyń jańa salmaqtaǵy alǵashqy jetistigi. Byltyrǵy Azııa chempıonatynda Ibragım Magomadov 72 keli salmaqta altyn júldeni jeńip aldy.

Búgin grek-rım kúresinen 63 keli salmaqta baq synaǵan Erjet Jarlyqasyn Azııa chempıonatynyń altyn medalin jeńip aldy.