رىباكينا رەسەيلىكتەرگە قازاقستاندى عانا تاڭدايتىنىن ايتتى

تەننيستەن 2022 جىلعى ۋيمبلدون ءتۋرنيرىنىڭ جەڭىمپازى، الەمنىڭ ءتورتىنشى، قازاقستاننىڭ ءبىرىنشى راكەتكاسى «سپورت-ەكسپەرسس» گازەتىنە سۇحباتىندا نە سەبەپتى قازاقستاندى تاڭداعانىن ايتتى.

ونىڭ سۇحباتى «ەندى مەنى جوعالتقان ادامدار تۋرالى اڭگىمەنىڭ ءبارى دە بوس اڭگىمە» (رىباكينا — و پەرەحودە يز روسسي ۆ كازاحستان: «كتو مەنيا پوتەريال ي كاك ەتو سلۋچيلوس، سەيچاس نەت سمىسلا وب ەتوم رازگوۆاريۆات») دەگەن تاقىرىپپىن شىققان.

ينتەرۆيۋدە تەننيسشى ءجۋرناليستىڭ: «رەسەيدە ءسىزدى جوعالتقان ءۇشىن كىم كىنالى؟» دەگەن سۇراعىنا بىلاي جاۋاپ بەرەدى.

«ءسىزدى كىم جوعالتتى؟ بۇل وقيعا قالاي بولدى؟» دەيسىز بە؟ مەنىڭشە، بىلەسىز بە قازىر بۇل تۋرالى ايتۋدىڭ ءمانى جوق سياقتى. كوڭىلىڭىزگە الماڭىز، ەندى مەنى جوعالتقان ادامدار تۋرالى اڭگىمەنىڭ ءبارى بوس اڭگىمە دەي ويلايمىن. قازاقستان ماعان سەندى. قازاقستانعا ويىنشى كەرەك بولدى. ءساتى كەلگەندە ءبىز ءبىر-ءبىرىمىزدى تاپتىق. سول ءۇشىن مەن قۋانىشتىمىن.

مەن كوپتەن بەرى قازاقستاننىڭ اتىنان جارىستارعا قاتىسىپ كەلەمىن. وعان دەيىن نە بولعانىن ءتىپتى، ويلاعىم دا كەلمەيدى، — دەدى رىباكينا.

وسىدان كەيىن ينتەرۆيۋرەر مەن سپورتشىنىڭ سۇراق-جاۋابى بىلاي ءوربىدى.

-ءسىز ۋيمبلدون ءتۋرنيرىن جەڭىپ العاندا رەسەيدە كەيبىر تەننيس فۋنكتسيونەرلەرى «رىباكينا – ءبىزدىڭ تەننيسشىمىز» دەپ ەدى. ءسىز وعان رەنجىگەندەي بولدىڭىز. ايتىڭىزشى، رەسەيگە سىزبەن قاي جاعىنان ماقتانۋعا بولادى؟ الدە ءسىزدى مۇلدەم ويىنا الماسىن با؟

— بۇل سۇراققا قالاي جاۋاپ بەرەتىنىمدى بىلمەيمىن. مەنىڭ جانكۇيەرىم كوپ. ولار الەمنىڭ تۇكپىر-تۇكپىرىندە بار.

رەسەي دە  ماعان تىلەۋلەس بولىپ جۇرگەن، ماعان جانكۇيەر ادامدار بار. سول ءۇشىن ولاورعا رازمەت ايتامىن. قازاقستاندا دا مەنىڭ جانكۇيەرىم كوپ. قازاقستاندا ماعان تىلەكتەس جانكۇيەر بارىنەن كوپ.

— ماسكەۋگە بارىپ تۇراسىز با؟ ءجيى بولىپ تۇراسىز با؟ ءسىزدىڭ ماسكەۋمەن قانداي بايلانىسىڭىز بار؟

— ماسكەۋگە وتە سيرەك بارامىن. جىلىنا ءبىر رەت دەسە بولادى. سوڭعى كەزدە مۇلدەم بارماپپىن. ماسكەۋمەن كوپ بايلانىسىم جوق. مەنىڭ جاۋابىم وسى. مەن ءبارىن ايتقان سياقتىمىن، — دەدى ول.

ەسكەرتە كەتەتىن ءبىر نارسە، ەلەنا رىباكينا ماسكەۋ قالاسىندا تۋعان. ول 2018 جىلدىڭ ماۋسىم ايىنا دەيىن رەسەيدىڭ قۇراما كومانداسىندا ويناپ كەلگەن. سول جىلى جاز ايلارىندا تەننيسشى قازاقستاننىڭ ازاماتتىعىن الدى.

قازىر رىباكينا WTA رەيتينگىندە 5 848 ۇپايمەن ءتورتىنشى ورىندا كەلەدى.

دايىنداعان داستان كەنجالين،

استانا