Rybakına reseılikterge Qazaqstandy ǵana tańdaıtynyn aıtty

Tennısten 2022 jylǵy Ýımbldon týrnıriniń jeńimpazy, álemniń tórtinshi, Qazaqstannyń birinshi raketkasy «Sport-Eksperss» gazetine suhbatynda ne sebepti Qazaqstandy tańdaǵanyn aıtty.

Onyń suhbaty «Endi meni joǵaltqan adamdar týraly áńgimeniń bári de bos áńgime» (Rybakına — o perehode ız Rossıı v Kazahstan: «Kto menıa poterıal ı kak eto slýchılos, seıchas net smysla ob etom razgovarıvat») degen taqyryppyn shyqqan.

Intervıýde tennısshi jýrnalıstiń: «Reseıde sizdi joǵaltqan úshin kim kináli?» degen suraǵyna bylaı jaýap beredi.

«Sizdi kim joǵaltty? Bul oqıǵa qalaı boldy?» deısiz be? Menińshe, bilesiz be qazir bul týraly aıtýdyń máni joq sııaqty. Kóńilińizge almańyz, endi meni joǵaltqan adamdar týraly áńgimeniń bári bos áńgime deı oılaımyn. Qazaqstan maǵan sendi. Qazaqstanǵa oıynshy kerek boldy. Sáti kelgende biz bir-birimizdi taptyq. Sol úshin men qýanyshtymyn.

Men kópten beri Qazaqstannyń atynan jarystarǵa qatysyp kelemin. Oǵan deıin ne bolǵanyn tipti, oılaǵym da kelmeıdi, — dedi Rybakına.

Osydan keıin ıntervıýrer men sportshynyń suraq-jaýaby bylaı órbidi.

-Siz Ýımbldon týrnırin jeńip alǵanda Reseıde keıbir tennıs fýnkıonerleri «Rybakına – bizdiń tennısshimiz» dep edi. Siz oǵan renjigendeı boldyńyz. Aıtyńyzshy, Reseıge sizben qaı jaǵynan maqtanýǵa bolady? Álde sizdi múldem oıyna almasyn ba?

— Bul suraqqa qalaı jaýap beretinimdi bilmeımin. Meniń jankúıerim kóp. Olar álemniń túkpir-túkpirinde bar.

Reseı de  maǵan tileýles bolyp júrgen, maǵan jankúıer adamdar bar. Sol úshin olaorǵa razmet aıtamyn. Qazaqstanda da meniń jankúıerim kóp. Qazaqstanda maǵan tilektes jankúıer bárinen kóp.

— Máskeýge baryp turasyz ba? Jıi bolyp turasyz ba? Sizdiń Máskeýmen qandaı baılanysyńyz bar?

— Máskeýge óte sırek baramyn. Jylyna bir ret dese bolady. Sońǵy kezde múldem barmappyn. Máskeýmen kóp baılanysym joq. Meniń jaýabym osy. Men bárin aıtqan sııaqtymyn, — dedi ol.

Eskerte ketetin bir nárse, Elena Rybakına Máskeý qalasynda týǵan. Ol 2018 jyldyń maýsym aıyna deıin Reseıdiń qurama komandasynda oınap kelgen. Sol jyly jaz aılarynda tennısshi Qazaqstannyń azamattyǵyn aldy.

Qazir Rybakına WTA reıtınginde 5 848 upaımen tórtinshi orynda keledi.

Daıyndaǵan Dastan KENJALIN,

ASTANA