فۋتبولدا قاقپاشى ۋاقىتتى سوزسا بۇرىشتاما بەرۋ ۇسىنىلدى

حالىقارالىق فۋتبول قاۋىمداستىعىنىڭ كەڭەسى (IFAB) فۋتبول ماتچى كەزىندە قاقپاشى ۋاقىتتى سوزعان جاعدايدا بۇرىشتاما دوبى نەمەسە اۋت بەرىلۋى مۇمكىن ەكەنىن حابارلادى.

بۇل ۇيىم فۋتبول ويىنىنىڭ ەرەجەلەرىن رەتتەۋمەن اينالىسادى. جاقىندا ۇيىم قاقپاشىلاردىڭ دوپقا يەلىك ەتۋ ۋاقىت حاتتاماسىن ازىرلەدى.

وسىعان بايلانىستى الداعى ۋاقىتتا قاقپاشى ۇزاق ۋاقىت بويى دوپتى ۇستاپ تۇرسا، قارسىلاس كومانداعا بۇرىشتامادان دوپ بەرۋ نەمەسە دوپتى اۋتتان تاستاۋ مۇمكىندىگى بەرىلۋى مۇمكىن.

IFAB ۇسىنىلعان ەرەجە وزگەرىستەرىن تورەشىلەردىڭ قازىرگى ەرەجەنى ساقتاماۋىمەن ءتۇسىندىرىپ وتىر. ەگەر قاقپاشى دوپتى 6 سەكۋندتان استام ۇستاسا، پەنالتي بەلگىلەنۋى كەرەك.

جاڭا ەرەجەگە سايكەس، بۇل ۋاقىتتى 8 سەكۋندقا دەيىن ارتتىرۋ ۇسىنىلادى. بۇل ۋاقىتتى تورەشى قاقپاشى دوپتى قابىلداعان ساتتەن باستاپ ساناي باستايدى. دوپتى بۇرىشتان نەمەسە اۋتتان لاقتىرۋ قاقپاشىعا ەڭ جاقىن قاناتتان ورىندالادى.

ESPN-ءنىڭ حابارلاۋىنشا، جاڭا ەرەجە 2024-2025 ماۋسىمدا سىناقتان وتەدى. IFAB وزگەرىستەردى 2025 جىلدىڭ سوڭىندا تالقىلايدى. ەگەر سىناقتار ءساتتى وتسە، جاڭا ەرەجە 2026-2027 ماۋسىمىنان باستاپ بارلىق جارىستارعا ەنگىزىلۋى مۇمكىن.