زاعيپ شاحماتشىلاردىڭ رەسپۋبليكالىق سايىسىنىڭ جالاۋى جەلبىرەدى

تاياۋدا تاراز قالاسىندا زاعيپ شاحماتشىلار اراسىندا جەكەلەي قازاقستان چەمپيوناتى اياقتالدى. زاعيپ شاحماتشىلار ەكى توپتا: كوزدەرى مۇلدەم كورمەيتىن جانە ءالسىز كورەتىندەر جەكەلەي رەتتە جارىستى .

كلاسسيكالىق ءداستۇرلى شاحماتپەن قوسا بيىل راپيد-جىلدام شاحمات تۇرىنەن دە العاش رەت جارىس قاتار ءوتتى.

كلاسسيكالىق جارىس 9 ويىنمەن ، ال راپيد-جىلدام شاحمات 7 ويىن كەزدەسۋىمەن شۆەيتسار جۇيەسىندە وتكىزىلدى .

ءبىرىنشى توپتاعى كوزدەرى كورمەيتىندەر ارنايى بەلگىسى بار ويىن تاستارىمەن وينايتىن شاحماتشىلاردىڭ كلاسسيكالىق جارىس قورىتىندىسىندا ەرلەر اراسىندا 7 ۇپاي جيناعان اباي وبلىسىنان قاتىسقان بولات قابىجانوۆ جەڭىمپاز اتاندى . ال 6،5 ۇپايمەن جامبىل وبلىسىنان ابدۋراشيت ءالىمحانوۆ ەكىنشى، 6 ۇپاي جيناعان استانالىق سادۋاقاس توقاباەۆ ءۇشىنشى ورىندى يەلەندى. ەرلەر اراسىنداعى راپيد سايىسىندا 5،5 ۇپاي جيناعان الماتىلىق ماقسۇت جۇمابەكوۆ ءبىرىنشى رەت راپيدتەن چەمپيون اتاندى (سۋرەتتە چەمپيون م جۇمابەكوۆ). ول بۇرىن دا 2006 جانە 2022 جىلدارى ءداستۇرلى سايىستا قازاقستاننىڭ چەمپيونى بولعان ەدى.

كەلەسى ورىنداردى 5 ۇپاي كورسەتكىشىمەن ابدۋراشيت ءالىمحانوۆ (تاراز) پەن بولات قابىجانوۆ (سەمەي) ەكىنشى -ءۇشىنشى جۇلدەلەرىمەن ءبولىستى .

كوزدەرى ءالسىز كورەتىن شاحماتشىلار اراسىندا كلاسسيكادان تۇركىستاندىق قۋانىشبەك جۇمادۋللاەۆ توعىز مۇمكىندىكتەن 8 ۇپاي جيناپ جەڭىمپاز اتاندى. قاراعاندىلىق مۇرات ءجۇنىسوۆ ەكىنشى، ال جەتىسۋ وبلىسىنان كەلگەن يۋري بەيبيكوۆ ءۇشىنشى ورىندا بولدى

راپيد-جىلدام شاحمات سايىسىندا دا تۇركىستاندىق قۋانىشبەك جۇمادۋللاەۆ جەتى مۇمكىندىكتەن 6،5 ۇپايمەن جەڭىمپاز اتانسا، باتىس قازاقستان وبلىسىنان كەلگەن ەرلان نۇرقاەۆ ەكىنشى ، قىزىلوردا وبلىسىنان قادىر جامالاگين ءۇشىنشى جۇلدەگە يە بولدى .

ايەلدەر اراسىندا ەكى توپتىڭ شاحماتشىلارى بىرىگىپ وينادى. كلاسسيكالىق سايىستا پەتروپاۆلدىق ايناگۇل تاشەنوۆا ءبىرىنشى ، تارازدىق ەڭلىك يگەنباەۆا ەكىنشى ، استانالىق مايرا توقاباەۆا ءۇشىنشى ورىنعا يە بولدى .

راپيد سايىسىندا ەڭلىك يگەنباەۆا (جامبىل وبلىسى) جەڭىمپاز اتانسا ، ايناگۇل تاشەنوۆا (سولتۇستىك قازاقستان وبلىسى) ەكىنشى ، مايرا توقاباەۆا (استانا) ءۇشىنشى جۇلدەلى ورىنداردان كورىندى .

جەڭىمپاز اتانعان جانە جۇلدە العان شاحماتشىلارعا مەدالدار مەن ارنايى ديپلومدار تابىستالدى .

باقداۋلەت قۇمار،

الماتى