استانادا بوكستان «ەلوردا كۋبوگى» ءتۋرنيرى باستالادى (ۆيدەو)

13-18 مامىر ارالىعىندا استانادا بوكستان «ەلوردا كۋبوگى» ءتۋرنيرى بولادى. وعان قاتىساتىن بوكسشىلار انىقتالدى، دەپ حابارلادى Olympic.kz.

تۋرنيرگە ۇلتتىق قۇرامانىڭ ءبىرىنشى، ەكىنشى جانە ءۇشىنشى ءنومىرلى سپورتشىلارى قاتىسادى.

ولاردىڭ اراسىندا وليمپيادا جولداماسىنىڭ يەگەرلەرى ساكەن بيبوسىنوۆ (51 كگ)، ماحمۇد سابىرحان (57 كگ)، اسلانبەك شىمبەرگەنوۆ (71 كگ)، نۇربەك ورالباي (81 كگ)، ايبەك ورالباي (92 كگ) مەن قامشىبەك قوڭقاباەۆ (+92 كگ) بار.

سونداي-اق، جارىستا الەم چەمپيوندارى تەمىرتاس ءجۇسىپوۆ (48 كگ)، بەكزاد نۇرداۋلەتوۆ (81 كگ)، الەم چەمپيوناتىنىڭ كۇمىس جۇلدەگەرلەرى دۋلات بەكباۋوۆ (63،5 كگ)، سەرىك تەمىرجانوۆ (57 كگ)، ازيا چەمپيونى تۇرسىنباي قۇلاحمەت، ازيا ويىندارىنىڭ قولا جۇلدەگەرى ساعىندىق توعامباي مەن ازيا ويىندارىنا قاتىسقان تاعى ءبىر بىلعارى قولعاپ يەسى ەرتۋعان زەينۋللينوۆ كۇش سىناسادى.

اياق استىنان كەلەڭسىز ءبىر جاعداي بولماسا، وليمپياداعا جولداما العان بارلىق بوكسشى وسى سىنعا قاتىسادى.  سەبەبى، بۇل تۋرنير سولارعا ارنالىپ وتكىزىلەدى. قازىر سپورتشىلاردىڭ ءبارى قاتاردا. بۇل وليمپيادا قارساڭىنداعى دايىندىق تۋرنيرلەرىنىڭ ءبىرى، — دەدى باس جاتتىقتىرۋشى مىرزاعالي ايتجانوۆ.

تۋرنيرگە جالپى ەسەبى 60-قا جۋىق بوكسشى قاتىسادى. وعان 9 ەلدىڭ بوكسشىلارى كەلەدى دەپ جوسپارلانىپ وتىر.

سودان كەيىن ۇلتتىق قۇراما كوماندا 23 مامىر مەن 6 ماۋسىم ارالىعىندا تايلاندتىڭ استاناسى – بانگكوك قالاسىندا وتەتىن ليتسەنزيالىق تۋرنيرگە قاتىسادى. وسى دودادا دا جەڭىمپاز اتانعاندار وليمپياداعا جولدامانى الادى.

 

View this post on Instagram

 

A post shared by Kazakhstan Boxing Federation (@boxingkazakhstan)