«ايەلدەر كۇرەسىنەن ۇلتتىق قۇراما وليمپيادادان تىس قالدى»: فەدەراتسياعا قويار سۇراق كوپ، جاۋاپ جوق

بيىل ايەلدەر كۇرەسىنەن ۇلتتىق قۇراما كوماندا وليمپيالىق ويىنداردان تاس قالدى. ەندى قۇراما كوماندانى جاتتىقتىراتىن قايرات ساعاديەۆتىڭ شاكىرتتەرى پاريج وليمپياداسىنا بارمايدى.

وسىعان بايلانىستى قازىر گرەك-ريم، ەركىن كۇرەس جانە ايەلدەر كۇرەسىنەن فەدەراتسيا ساعاديەۆتى وتستاۆكاعا جىبەرە مە دەگەن ساۋال تۋىنداپ وتىر.

2015 جىلى گوزال مانيۋروۆا ايەلدەر كۇرەسىنەن قازاقستان كومانداسىنىڭ باس جاتتىقتىرۋشى قىزمەتىنەن كەتىپ، ونىڭ ورنىنا جاستار قۇراماسىنىڭ تالىمگەرى قايرات ساعاديەۆ كەلدى. ءبىر جىلدان كەيىن برازيليانىڭ ريو-دە جانەيرو قالاسىندا وتكەن وليمپياداعا ايەلدەر كۇرەسىنەن قازاقستان كومانداسىن ساعاديەۆ اپاردى. قازاقستان قۇراماسىنىڭ ءۇش بىردەي سپورتشىسى گوزال مانيۋروۆا، ەلميرا سىزدىقوۆا مەن ەكاتەرينا لارينوۆا وليمپياداعا قاتىسىپ، 1 كۇمىس پەن 2 قولا مەدال جەڭىپ الدى.

ءبىر جىلدىڭ ىشىندە ساعاديەۆتىڭ وسىنشا تابىسقا جەتۋى گ.مانيۋروۆانىڭ دا ۇلەسى بار ەكەنىن ۇمىتپاۋ كەرەك. مانيۋروۆا رەسەيدەن كەلگەن لەگيونەر، سىزدىقوۆا بولسا سولتۇستىكتىڭ تۋماسى، ال لاريونوۆا باتىستىڭ قىزى. ول كەزدە مانيۋروۆانىڭ وكپەسى مەن كەگى، سىزدىقوۆا مەن لاريونوۆانىڭ وليمپياداعا العاش قاتىسىپ، جۇلدە الۋى ولاردىڭ ارمانى تۇعىن. ەلميرا مەن ەكاتەرينا مۇمكىندىكتەرىن تولىق پايدالانا ءبىلدى.

توكيو-2021 وليمپياداسىندا ايەلدەر كۇرەسىنەن قازاقستان كومانداسىنىڭ باس جاتتىقتىرۋشىسى بولعان نۇرلان امانقوسوۆتىڭ شاكىرتتەرى ۆالەنتينا يسلاموۆا (50 كگ)، تاتيانا امانجول (53 كگ) مەن ەلميرا سىزدىقوۆا (76 كگ) باق سىناپ، جۇلدە الا المادى. ەگەر دە نۇرلان امانقوسوۆ مىقتى باپكەر بولعاندا شاكىرتتەرى جۇلدە الۋى كەرەك ەدى. ءۇش جىلدا ءبىر وليمپيادا جۇلدەگەرىن شىعارا الماعانى ۇيات قوي.

ايەلدەر كۇرەسىنەن قۇراما ۇزدىگى ءجاميلا باقبەرگەنوۆا 72 كەلى سالماقتا ءۇش رەت الەم چەمپيوناتىندا 2 كۇمىس، 1 قولا جۇلدە الدى. وليمپيالىق ەمەس سالماقتا الەم چەمپيوناتىندا جۇلدە العان ول نەگە توكيو ويىندارىنا بارا المادى؟

فەدەراتسياعا قويار سۇراق كوپ، جاۋاپ جوق.

«بىشكەك-2024» ازيالىق ىرىكتەۋ ءتۋرنيرى مەن «ىستانبۇل-2024» الەمدىك ليتسەنزيالىق تۋرنيرىنە قاتىسقان ايەلدەر كۇرەسىنەن قازاقستان كومانداسى پاريج وليمپياداسىنا جولداما الا المادى. ءۇش جىلدا قايرات ساعاديەۆ جاتتىقتىراتىن ايەلدەر كۇرەسىنەن بىردە-ءبىر بالۋان فرانتسياعا بارمايتىن بولدى. ەندى بالۋان-ايەلدەر Qazsport تەلەارناسىنانوليمپيادانى ۇيلەرىندە كورەتىن بولدى. اسىرەسە، ايەلدەر كۇرەسىنەن قازاقستان كومانداسىندا جاسى وتىزدان اسقاندار ءالى كۇنگە دەيىن كۇرەسىپ ءجۇر. ولار قۇرامادا نە ىستەپ ءجۇر؟ الدە ولار باس باپكەردىڭ «ليۋبيمچيكتەرى» مە؟

قازاقستان گرەك-ريم، ەركىن جانە ايەلدەر كۇرەس فەدەراتسيانىڭ پرەزيدەنتى داۋلەت تۇرلىقانوۆقا سۇراق: جاسى 35-تەن اسقان بالۋانداردى جيناي بەرگەنشە، جاستارعا كوڭىل ءبولىپ، ولاردى جاپونيا، ەۋروپا مەن امەريكاعا وقۋ-جاتتىعۋ جيىنىنا جىبەرمەيسىز بە؟ مىسالى، جىلىنا كۇرەس فەدەراتسياسىنا 2 ملرد 800 ملن تەڭگە بولىنەدى. كۇرەسكە بولىنگەن اقشانى قالاي يگەرىپ جاتسىز؟ ءوزىڭىز باسقاراتىن كۇرەسكە رەفورما كەرەك ەكەنىن بىلەسىز بە؟

ايبەك مۇحانوۆ،

اقتاۋ